विराटनगर । जेन-जी आन्दोलनकी अभियन्ता रक्षा बमले आन्दोलनसँग जोडिएका घटनाबारे सत्य तथ्य सार्वजनिक गर्न एवं आफूहरुमाथि लागेका आरोपको जवाफ दिन प्रधानमन्त्री सुशीला कार्कीसँग माग गरेकी छन् ।
उनले शनिबार सामाजिक सञ्जालमा लेख्दै भदाै २३ र २४ काे शान्तिपूर्ण आन्दोलन एकाएक हिंसात्मक भई गोली चलाउने आदेश कसले दियो भन्दै प्रश्न गरेकी छन् ।
उनले लेखेकी छिन्, ‘म यो पनि जान्न चाहन्छु कि हाम्रो शान्तिपूर्ण आन्दोलन एकाएक हिंसात्मक कसरी भयो ? गोली चलाउने आदेश कसले दियो ।’
पछिल्लो समय सडक र सामाजिक सञ्जालमा आफूहरूमाथि गम्भीर आरोप र दुर्व्यवहार भइरहेको भन्दै त्यसप्रति सरकार मौन बस्न नहुने उनले बताएकी छन् ।
उनले आन्दोलनमा संलग्न व्यक्तिमाथि विभिन्न आरोप लगाइँदै आएको भन्दै आरोपहरूको सत्यता प्रस्ट पार्न गौरीबहादुर कार्की आयोगको आधिकारिक प्रतिवेदन सार्वजनिक गर्न आग्रह गरेकी छन् ।
उनले लेखेकी छिन,‘प्रधानमन्त्रीज्यू, मेरो हातमा रगत लागेको छ कि छैन, म त्यो जान्न चाहन्छु । म त्यो जान्न चाहन्छु। म कतैबाट परिचालित छु कि छैन, यी सबै प्रश्नहरूको उत्तर म पनि जान्न चाहन्छु। कृपया प्रतिवेदन सार्वजनिक गरिदिनुहोस्। त्यो तपाईको जिम्मेवारी हो ।’
उनले आफूहरूमाथि लागेको आरोपबारे स्पष्टता खोज्दै ‘मेरो हातमा रगत लागेको छ कि छैन, म जान्न चाहन्छु,’ भन्ने प्रश्न समेत उठाएकी छन् ।
उनी भदौ २३ मा भएको जेन-जी विद्रोहकी अगुवा हुन् ।
