काठमाडौं – नवनिर्वाचित प्रतिनिधि सभा सदस्यहरूको शपथ ग्रहण कार्यक्रम चैत १२ गते बिहीबार हुने भएको छ। संघीय संसद सचिवालयले शुक्रबार सूचना जारी गर्दै शपथ कार्यक्रमको मिति र प्रक्रिया सार्वजनिक गरेको हो।
सचिवालयका अनुसार शपथ ग्रहण कार्यक्रम दिउँसो २ बजे सङ्घीय संसद् भवनको बहुउद्देश्यीय सभाकक्षमा आयोजना हुनेछ। कार्यक्रममा सहभागी हुन सांसदहरूलाई निर्धारित समयभन्दा कम्तीमा दुई घन्टा अगावै उपस्थित हुन आग्रह गरिएको छ।
शपथका लागि उपस्थित हुने सांसदहरूले निर्वाचन आयोगबाट प्राप्त प्रतिनिधि सभा सदस्य पदको प्रमाणपत्र (सक्कल तथा प्रतिलिपि), नेपाली नागरिकताको प्रमाणपत्रको प्रतिलिपि तथा हालसालै खिचिएको पासपोर्ट साइजको फोटो दुई प्रति अनिवार्य रूपमा साथमा ल्याउनुपर्नेछ।
सचिवालयले सांसदहरूलाई औपचारिक पोशाक वा आफ्नो सांस्कृतिक पहिचान झल्किने पोशाकमा उपस्थित हुन पनि अनुरोध गरेको छ।
यस्तै, नेपाली भाषा बाहेक अन्य मातृभाषामा शपथ लिन इच्छुक सांसदहरूले प्रतिनिधि सभा सदस्य निर्वाचन ऐन, २०७४ को अनुसूची–३ अनुसारको शपथको व्यहोरा सम्बन्धित भाषामा अनुवाद गरी शपथ कार्यक्रमभन्दा कम्तीमा तीन दिन अगावै सचिवालयको सांसद सुविधा व्यवस्थापन शाखामा वा इमेलमार्फत बुझाउनुपर्ने व्यवस्था गरिएको छ।
सचिवालयले शपथ कार्यक्रमलाई व्यवस्थित र सहज बनाउन आवश्यक सम्पूर्ण तयारी पूरा गर्न सांसदहरूलाई समयमै समन्वय गर्न आग्रह गरेको छ।
