काठमाडौं — धादिङ का १३ वटै स्थानीय तहले प्रतिनिधिसभा सदस्य आशिका तामाङको निर्देशनविरुद्ध प्रतिवाद गर्ने निर्णय गरेका छन्।
बिहीबार नीलकण्ठ नगरपालिकाका प्रमुख भीमप्रसाद ढुंगानाको अध्यक्षतामा बसेको बैठकले स्थानीय सरकारको संवैधानिक अधिकारमा हस्तक्षेप भएको भन्दै कडा आपत्ति जनाएको हो।
यसअघि तामाङले बेनीघाट रोराङ गाउँपालिका–९ स्थित त्रिशूली नदीबाट भइरहेको अवैध उत्खनन रोक्न तथा राजमार्गमा ‘पटके कर’ जस्ता अवैध शुल्क संकलन बन्द गर्न निर्देशन दिएकी थिइन्।
स्थानीय तहका जनप्रतिनिधिहरूले उक्त निर्देशनलाई आफ्नो अधिकार क्षेत्रमा हस्तक्षेपको रूपमा व्याख्या गर्दै संघीयताको मर्मअनुसार तीनै तहबीच समन्वय र सम्मान कायम गर्न सरकारको ध्यानाकर्षण गराएका छन्।
