काठमाडौं — बजारमा खाना पकाउने एलपी ग्यासको अभाव भइरहेका बेला श्रीराम ग्यास उद्योग को हरिसिद्धि डिपोमा ठूलो परिमाणमा ग्यास सिलिन्डर स्टक गरेर राखिएको फेला परेको छ।
वाणिज्य, आपूर्ति तथा उपभोक्ता संरक्षण विभाग को अनुगमन टोलीले डिपोमा १४.२ केजीका ६ हजार ३ सय ७७ वटा भरिएका ग्यास सिलिन्डर थुपारेर राखिएको भेटेको हो।
उद्योगले बजारमा पठाउन आनाकानी गर्दै कृत्रिम अभाव सिर्जना गरेको ठहर गर्दै उपभोक्ता संरक्षण ऐन २०७५ अनुसार उद्योगलाई ३ लाख रुपैयाँ जरिवाना गरिएको छ।
विभागले मौज्दात रहेका सबै सिलिन्डरहरू नेपाल आयल निगम को समन्वयमा तत्काल उपभोक्तालाई बिक्री वितरण गर्न निर्देशन दिएको जनाएको छ।
विभागका अनुसार बजारमा ग्यास नपाएर सर्वसाधारण लाइन बस्नुपर्ने अवस्थामा ठूलो परिमाणमा ग्यास होल्ड गरेर राख्नु गैरकानुनी कार्य हो।
