विराटनगर । अन्तर्राष्ट्रिय बजारमा भएको मूल्य वृद्धि तथा आपूर्ति व्यवस्थापनको दबाबलाई कारण देखाउँदै नेपाल आयल निगमले पेट्रोल, डिजेल तथा मट्टीतेलको खुद्रा बिक्री मूल्यमा भारी वृद्धि गरेको छ । इन्डियन आयल कर्पोरेशनबाट पेट्रोलमा प्रतिलिटर ३१ रूपैयाँ, डिजेलमा ५४ रुपैयाँ एलपी ग्यासमा प्रतिसिलिण्डर २१६ पैसाले बढेर आएको छ ।
अब कायम नयाँ मूल्यअनुसार पेट्रोल प्रतिलिटर १५ रुपैयाँ, डिजेल/मट्टितेल प्रतिलिटर १० रुपैयाँले बढाइएको छ । एलपी ग्यासको खरिद मूल्य बढे पनि उपभोक्ताको हितलाई ध्यानमा राख्दै ग्यासको खुद्रा बिक्री मूल्य यथावत राखिएको निगमले जनाएको छ ।
निगमले चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्जमा पेट्रोलको नयाँ मूल्य प्रतिलिटर १६९ रुपैयाँ ५० पैसा कायम गरेको छ । यसैगरी, दाङ र सुर्खेतमा १७१ रुपैयाँ र काठमाडौं, पोखरा र दिपायलमा १७२ रुपैयाँ कायम गरिएको छ । डिजेल/मट्टितेलको मूल्य क्रमशः १४९ रुपैयाँ ५० पैसा, १५१ रुपैयाँ ५० पैसा र १५२ रुपैयाँ प्रतिलिटर तोकिएको छ । नयाँ मूल्य गएरातिदेखि लागू भएको छ ।
