विराटनगर । हालै सम्पन्न प्रतिनिधिसभा सदस्य निर्वाचनबाट पहिलो दल बन्न सफल राष्ट्रिय स्वतन्त्र पार्टी (रास्वपा)ले समानुपातिक सांसद्को सूची तय गरेको छ । रास्वपाको आइतबार बसेको सचिवालय बैठकले समानुपातिक निर्वाचन प्रणालीबाट सांसद् बन्ने ५७ जनाको नामावली टुंगो लगाएको हो ।
४८ महिला र ९ पुरुषको नामावली टुंगो लगाएको रास्वपाले क्लस्टरअनुसार आजै उक्त सूची निर्वाचन आयोगलाई बुझाउने निर्णय गरेको छ । आयोगबाट प्रमाणीकरण भएपछि मात्र नाम सार्वजनिक गर्ने तयारी रास्वपाको छ ।
रास्वपाले खासआर्यबाट १७, आदिवासी जनजातीबाट १६, मधेशीबाट ९, दलितबाट ८, थारुबाट ४ र मुस्लिम समुदायबाट ३ जनाको नाम टुंगो लगाएको छ । फागुन २१ गते सम्पन्न प्रतिनिधिसभा सदस्य निर्वाचनबाट प्रत्यक्षतर्फ ऐतिहासिक सफलता हासिल गर्दै देशभरका १२५ निर्वाचन क्षेत्रमा जित दर्ता गरेको थियो ।
