कास्की — पूर्वमन्त्री डा. महावीर पुनमाथि अभद्र व्यवहार गर्ने एक जनालाई प्रहरीले पक्राउ गरेको छ।
जिल्ला प्रहरी कार्यालय कास्कीका अनुसार पोखरा महानगरपालिका–९ पृथ्वीचोकस्थित कार्यक्रममा डा. पुन नेतृत्वको टोलीले ‘महावीर पुन सम्झना, सपना र अविरल यात्रा’ नामक पुस्तक बिक्री गरिरहेका बेला एक व्यक्तिले अपशब्द प्रयोग गर्दै अभद्र व्यवहार गरेको घटना सार्वजनिक भएको थियो।
घटनाबारे सामाजिक सञ्जालमा भिडियो सार्वजनिक भएपछि प्रहरीले सूक्ष्म अनुसन्धान सुरु गरेको थियो। अनुसन्धानका क्रममा उक्त घटनामा संलग्न रहेको आरोपमा पोखरा महानगरपालिका–१३ बौद्धबाट बस्ने ४३ वर्षीय विकास गुरुङलाई पक्राउ गरिएको प्रहरीले जनाएको छ। उनलाई पोखरा महानगरपालिका–५ महेन्द्रपुलबाट नियन्त्रणमा लिएर थप अनुसन्धान अघि बढाइएको छ।
प्रहरीका अनुसार पक्राउ परेका गुरुङ यसअघि पनि तीन पटक लागूऔषध मुद्दामा सजाय भोगिसकेको प्रहरी अभिलेखमा उल्लेख छ। घटनाबारे थप अनुसन्धान जारी रहेको प्रहरीले जनाएको छ।
