काठमाडौँ: नेकपा एमालेका सचिव महेश बस्नेतविरुद्ध अदालतको अवहेलना गरेको आरोपमा मुद्दा दायर भएको छ।
माघ ११ गते प्रेस चौतारी नेपालले आयोजना गरेको अन्तरक्रिया कार्यक्रममा बस्नेतले दिएको अभिव्यक्तिले अदालतको अवहेलना गरेको भन्दै बुधबार उनीविरुद्ध मुद्दा दायर गरिएको हो। उक्त मुद्दाको सुनुवाइ आगामी चैत १ गते आइतबारका लागि तोकिएको छ।
बस्नेतविरुद्ध अधिवक्ता अवन न्यौपानेले मुद्दा दायर गरेका हुन्। रिट निवेदनमा बस्नेतले प्रधानन्यायाधीशसहित न्यायाधीशहरूलाई लक्षित गर्दै अदालतप्रति अवहेलना हुने खालका अभिव्यक्ति दिएको उल्लेख गरिएको छ।
बस्नेतले न्यायाधीशहरू रोग लागेको बहानामा गायब हुने, डर, दबाब वा प्रलोभनमा परेर न्यायिक प्रक्रिया ढिला गर्ने तथा न्याय नदिने जस्ता आरोप लगाएको निवेदनमा उल्लेख छ।
त्यस्तै, उनले देश वैदेशिक आक्रमणमा परेको र सर्वोच्च, उच्च तथा जिल्ला अदालत मात्र होइन, समग्र न्याय प्रणाली नै जलेको जस्तो अवस्था भएको भन्दै अदालतप्रति सार्वजनिक रूपमा आलोचना गरेको पनि रिटमा जनाइएको छ।
अधिवक्ता न्यौपानेले बस्नेतलाई अदालतको अवहेलनामा कारबाही चलाएर हदैसम्मको सजाय दिन माग गरेका छन्।
