विराटनगर । झापा ५ बाट प्रतिनिधिसभा सदस्यमा निर्वाचित बालेन्द्र साह निर्वाचन खर्च विवरण सार्वजनिक गरेका छन् । यससँगै पूर्वप्रधानमन्त्री केपी शर्मा ओलीलाई उनकै क्षेत्रमा हराएर सनसनी मच्चाएका बालेन निर्वाचन खर्च विवरण सार्वजनिक गर्ने पहिलो उम्मेदवार बनेका छन् ।
रास्वपाका वरिष्ठ नेता बालेनले मतपरिणाम सार्वजनिक भएको केही समयपछि नै निर्वाचन खर्च सार्वजनिक गरे । निर्वाचन प्रतिनिधिमार्फत जिल्ला निर्वाचन कार्यालय झापामा पेस गरिएको विवरणअनुसार उनले निर्वाचन अभियानका क्रममा १४ लाख १७ हजार २२९ रुपैयाँ खर्च भएको उल्लेख गरेका छन् ।
निर्वाचन खर्च सम्बन्धी फाराममार्फत बुझाइएको विवरणमा प्रचार–प्रसार, सवारी साधन भाडा, कार्यालय सञ्चालन तथा विभिन्न व्यवस्थापन खर्च समावेश गरिएको छ । विवरणअनुसार चुनावी अभियानका क्रममा सवारी साधन भाडामा २ लाख ९३ हजार ८०० रुपैयाँ खर्च गरिएको उल्लेख छ ।
त्यस्तै, हवाई भाडा शीर्षकमा ३५ हजार रुपैयाँ र मतदाता प्रशिक्षण कार्यक्रममा २८ हजार ९७० रुपैयाँ खर्च भएको उल्लेख गरिएको छ । सबैभन्दा बढी रकम भने वडा स्तरमा सञ्चालन गरिएको प्रचार कार्यक्रममा खर्च भएको देखिन्छ, जसमा ५ लाख ८० हजार रुपैयाँ खर्च भएको विवरणमा उल्लेख गरिएको छ ।
यस्तै नमुना मतपत्र छपाइमा ४९ हजार ८५० रुपैयाँ, क्षेत्रीय निर्वाचन कार्यालय सञ्चालनमा १ लाख २० हजार रुपैयाँ र स्टेसनरी तथा कार्यालय व्यवस्थापनमा २२ हजार ८२० रुपैयाँ खर्च गरिएको जनाइएको छ । यस्तै, प्रचार सामग्री झण्डा र ब्याचमा १ लाख ५७ हजार र ब्यानर तथा टोकनमा १ लाख १९ हजार रुपैयाँ खर्च भएको विवरणमा उल्लेख छ । यसबाहेक मनोनयन दर्ता शुल्कका रूपमा १० हजार रुपैयाँ खर्च गरिएको उनको विवरणमा उल्लेख छ ।
