काठमाडौं — प्रतिनिधिसभा निर्वाचनको मतगणनामा राष्ट्रिय स्वतन्त्र पार्टी ले स्पष्ट बहुमत ल्याउने संकेत देखिएपछि नेपाली सेयर बजारमा ठूलो उत्साह देखिएको छ। लगानीकर्ताले अब पाँच वर्ष स्थिर सरकार र लगानीमैत्री वातावरण बन्ने अपेक्षा गरेका छन्।
सोमबार नेप्से परिसूचकमा लगातार तीन पटक सर्किट ब्रेक लागेपछि कारोबार समयअघि नै बजार बन्द भएको छ। प्रि–ओपनमै करिब १.५ प्रतिशतभन्दा बढी बढेको नेप्से नियमित कारोबार सुरु भएपछि तीव्र गतिमा उकालो लागेको थियो।
११:०१ बजे नेप्से ४ प्रतिशत बढेपछि पहिलो सर्किट लागेर कारोबार २० मिनेटका लागि रोकियो। त्यसपछि खुलेको बजारमा पनि उकालो जारी रहँदा ११:२१:१३ बजे दोस्रो सर्किट लागेर कारोबार ४० मिनेटका लागि स्थगित भयो।
पुनः १२:०१:१३ बजे खुलेको बजारमा नेप्से फेरि तीव्र गतिमा बढ्दा १२:०१:३७ बजे तेस्रो सर्किट लागेर उक्त दिनका लागि कारोबार बन्द गरिएको हो।
यस दिन नेप्से परिसूचक १६२.९३ अंक बढेर २८७५.४३ विन्दुमा पुगेको छ।
सेन्सेटिभ इन्डेक्स : २८.११ अंक वृद्धि
फ्लोट इन्डेक्स : ११.४३ अंक वृद्धि
सेन्सेटिभ फ्लोट : ९.९६ अंक वृद्धि
कुल २६१ कम्पनीका ४ हजार ५१ कारोबारमार्फत ५५ करोड ५९ लाख ६३ हजार रुपैयाँ बराबरको ११ करोड ४३ लाख कित्ता सेयर किनबेच भएको छ।
यस दिन कर्पोरेट डेभलपमेन्ट बैंक, शिवश्री हाइड्रोपावर, हिमालयन रि इन्स्योरेन्स र सिटि होटल को सेयर सकारात्मक सर्किट लेभलमा कारोबार भएको छ।
कारोबार रकमका आधारमा नारायणी डेभलपमेन्ट बैंक शीर्ष स्थानमा रह्यो, जसको ३ करोड १३ लाख रुपैयाँ बराबरको कारोबार भयो। त्यसपछि शिवम् सिमेन्ट्स (२ करोड ८९ लाख) र एसवाई प्यानल नेपाल (२ करोड ८६ लाख) को कारोबार भएको छ।
उपसमूहगत रूपमा १३ वटै उपसमूहको परिसूचक बढेको छ। सबैभन्दा धेरै व्यापार उपसमूह ७.७३ प्रतिशत बढेको छ। त्यस्तै लगानी, बैंकिङ र जलविद्युत उपसमूह करिब ७ प्रतिशत बढेका छन् भने विकास बैंक, वित्त, होटल तथा पर्यटन, उत्पादन तथा प्रशोधन र अन्य उपसमूह पनि ५ प्रतिशतभन्दा बढी बढेका छन्।
