काठमाडौं — भदौ २३ र २४ गते भएको घटनाको छानबिन गर्न गठित जाँचबुझ आयोगले तत्कालीन प्रधानमन्त्री केपी शर्मा ओली सहित उच्चपदस्थ अधिकारीमाथि फौजदारी कारबाही गर्न सिफारिस गरेको छ।
पूर्व न्यायाधीश गौरीबहादुर कार्की नेतृत्वको आयोगले झण्डै ६ महिना लगाएर तयार पारेको प्रतिवेदनमा तत्कालीन गृहमन्त्री रमेश लेखक, प्रहरी महानिरीक्षक चन्द्र कुबेर खापुङ लगायतमाथि कारबाही सिफारिस गरिएको आयोग स्रोतले जनाएको छ।
त्यसैगरी काठमाडौंका तत्कालीन प्रहरी प्रमुख एसएसपी विश्व अधिकारी (हाल डीआईजी) र तत्कालीन प्रमुख जिल्ला अधिकारी छविलाल रिजाल माथि पनि कारबाही सिफारिस गरिएको बताइएको छ।
आयोगले भदौ २३ र २४ गतेका घटनालाई छुट्टाछुट्टै रूपमा जाँचबुझ गरेको जनाएको छ। भदौ २३ मा प्रहरीले गोली चलाउँदा सुरुवातमा १९ जनाको मृत्यु भएको थियो। प्रहरीलाई गोली चलाउन आदेश दिएको भन्दै तत्कालीन प्रहरी महानिरीक्षक खापुङ र परिस्थिति नियन्त्रणबाहिर जाँदा पनि माथिल्लो तहमा जानकारी नगराएको भन्दै फिल्ड कमान्डरमाथि पनि कारबाही सिफारिस गरिएको स्रोतले जनाएको छ।
आयोगका अनुसार छानबिनबाट दोषी देखिएका केहीलाई फौजदारी कारबाही तथा केहीलाई स्पष्टीकरण सोध्ने सिफारिस गरिएको छ। साथै आन्दोलनका क्रममा प्रहरीसँगै सरकारी कार्यालय जोगाउन सक्रिय व्यक्तिलाई पुरस्कार दिन पनि आयोगले सुझाव दिएको छ।
आयोगका अध्यक्ष कार्कीले प्रतिवेदन सार्वजनिक गर्न आफूले प्रधानमन्त्रीलाई आग्रह गरेको बताउँदै प्रधानमन्त्रीले अध्ययनपछि प्रतिवेदन सार्वजनिक गर्ने बताएका छन्।
