विराटनगर । आगामी बिहीबार हुने प्रतिनिधिसभा सदस्य निर्वाचनअन्तर्गत कतै पनि मतदान स्थगित नभएमा र शान्तिपूर्ण रुपमा निर्वाचन सम्पन्न भएमा भने फागुन २५ गतेभित्र नतिजा तयार गर्ने निर्वाचन आयोगको तयारी छ । छिटोभन्दा छिटो मतगणना सक्ने लक्ष्य लिएको आयोगले प्रत्यक्ष र समानुपातिक दुवैको नतिजा फागुन महिनाभित्र तयार गरेर राष्ट्रपतिलाई निर्वाचन प्रतिवेदन बुझाउने तयारी गरेको छ ।
मतदान सकिएपछि निर्वाचन अधिकृतको कार्यालयले सुरुमा प्रत्यक्षतर्फ मतगणना गर्छ । अनि त्यसपछि समानूपातिकको मतगणना गरी प्राप्त मतहरुको संख्या निर्वाचन आयोगमा पुर्याउँछ । समानुपातिक मतको बाँडफाडपछि निर्वाचन आयोगले दलहबीविच समानुपातिक सिटको बाँडफाँट गरिदिन्छ र दलहरूले निर्वाचित सांसदहरुको सूची निर्वाचन आयोगमा बुझाउँछन् । निर्वाचन आयोगले निर्वाचन परिणाम सार्वजनिक गरेपछि अर्को सरकार गठनको प्रक्रिया स्वतः सुरु हुन्छ । कुनै दलले स्पष्ट बहुमत पाएको अवस्थामा राष्ट्रपतिले उक्त दलको संसदीय दलको नेतालाई प्रधानमन्त्रीमा नियुक्त गर्छन् ।
