जनकपुरधाम— सर्लाहीमा खटिएका एक मतदान अधिकृतको निधन भएको छ। मंगलबार (फागुन १९) दिउँसो करिब २ बजे अचानक बेहोस भएका ४२ वर्षीय रघुनाथ महतोको उपचारका क्रममा मृत्यु भएको हो।
बरहथवा नगरपालिका–५ स्थित आधारभूत स्वास्थ्य केन्द्र बरहथवामा कार्यरत महतो पर्सा गाउँपालिका–४ स्थित जिगडवा आधारभूत विद्यालयमा मतदान अधिकृतका रूपमा खटिएका थिए।
जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईका अनुसार अचानक बेहोस भएपछि महतोलाई प्रादेशिक अस्पताल मलंगवा पठाइएको थियो। दिउँसो करिब साढे २ बजे चिकित्सकले उनलाई मृत घोषणा गरेका थिए।
घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।
