धरान। नेपाल युवा उद्यमी मञ्च (एनवाइइएफ) सुनसरी च्याप्टरको आयोजनामा सम्पन्नमा ‘एनवाइइएफ एमेच्योर गल्फ प्रतियोगिता–२०२६’ को नेट उपाधि आकाश दुलालले जित्नु भएको छ। धरानस्थित गल्फ कोर्समा सम्पन्न प्रतियोगितामा ३९ नेट स्कोर गर्दै दुलालले प्रतियोगिताको नेट उपाधि जित्नु भएको हो।
त्यस्तै, ३६ नेट स्कोर गर्दै प्रमोद राई दोस्रो र ३६ नेट स्कोर नै गरेका दिपक पोखरेलले भने काउन्ट-ब्याकको आधारमा तेस्रो स्थानमा रहनु भएको थियो। प्रतियोगिताको ग्रस तर्फ ६९ स्कोर गर्दै सुन्दर राईले प्रथम स्थान प्राप्त गर्नु भएको थियो।
प्रतियोगितामा महिलातर्फ ३६ स्कोर गर्दै आस्था दुलाल र सिनियरतर्फ ३३ स्कोरसहित बोमप्रसाद लिम्बू प्रथम हुनु भएको थियो।
प्रतियोगितामा लङ्गेष्ट ड्राइभको पुरस्कार विवेक राईले जित्दा नियरेष्ट टु दि पिन नितेश गुप्ता र मोष्ट बर्डिज पदमहाङ्ग लिम्बूले जित्नु भएको थियो।
धरान गल्फ कोर्समा सम्पन्न प्रतियोगिताको समापन समारोह इटहरीस्थित सोल्टी वेस्टल्याण्डमा सम्पन्न भएको थियो।
एनवाइइएफ सुनसरीका अध्यक्ष राजीव घिमिरेले प्रतियोगितामा १ सय ५० जना भन्दा बढी उद्यमी, व्यवसायी तथा पेशाकर्मीहरूको उपस्थितिले प्रतियोगितालाई भव्य बनाएको बताउनु भएको थियो।
