रंगेली । मोरङ निर्वाचन क्षेत्र नम्बर २ मा मध्यरातमा मतदातालाई पैसा बाँडेको भन्दै नेपाली कांग्रेस नेताहरूलाई स्थानीय युवाले नियन्त्रणमा लिएर प्रहरीलाई बुझाएका छन् ।
रतुवामाई नगरपालिका-७ मा शनिबार राति करिब १० बजेतिर कांग्रेसका नेता-कार्यकर्ता सवार गाडी स्थानीय युवाले रोकेर जाँच गर्दा पैसा बाँड्न गएको आशंकामा नियन्त्रणमा लिएका हुन् ।
नेपाली कांग्रेसका मोरङ क्षेत्र नम्बर २ का आर्थिक परिचालन कमिटी संयोजक खड्ग चोङ्बाङ, टेकनाथ घिमिरे र चक्र नेपालीलाई स्थानीय युवाले पैसा बाँड्दा बाँड्दै नियन्त्रणमा लिएका हुन् ।
स्थानीय युवाले गाडी रोकेर केही केरकार गर्न थालेपछि केही नेता भने घटनास्थलबाट फरार भएका थिए । रतुवामाई १० का काङ्ग्रेसबाट विजयी वडाध्यक्ष तथा नगर प्रवक्ता भुलबहादुर कार्की (आशिष्) भने घटनास्थल बाट फरार भएको सिजुवा प्रहरीले जनाएको छ ।
इलाका प्रहरी कार्यालय सिजुवाका प्रहरी निरीक्षक कैलाश लिम्बुका अनुसार जनप्रतिनिधिसहित कांग्रेसका नेताहरूको साथबाट चार लाख ४८ हजार रुपैयाँ र प्रचारप्रसार सामग्री बरामद भएको छ ।
जबकि, जनप्रतिनिधिले चुनावी प्रचारप्रसार गर्न पाउँदैनन् । तर, कांग्रेस उम्मेदवार डा. मीनेन्द्र रिजाल प्रचार प्रसारमा खुलेआम लागेका उनीहरूले मतदातालाई बाँड्न ठुलो रकम बोकेको स्थानीयको आरोप छ ।
मिति नजिकिँदै जाँदा हरेक निर्वाचनमा रकम बाँड्ने आरोप लागेका डा. रिजालले यसपटक पनि आफ्ना कार्यकर्तामार्फत् पैसा बाँडेर चुनाव जित्न खोजेको आरोप उनीहरूको छ ।
प्रहरीको प्रारम्भिक अनुसन्धानअनुसार ४ लाख ४८ हजार बरामद भएको जान्कारी आएको छ । प्रहरी हिरासतमा रहेका उनीहरूमाथि अहिले अनुसन्धान भइरहेको छ ।
स्थानीयको सूचनापछि सिजुवा प्रहरीका डिएसपी राजु पाण्डेसहितको टोली घटनास्थल पुगेको थियो । स्थानीय युवा र कांग्रेस नेताबीच भनाभन र मुडभेटको अवस्था सिर्जना हुने देखिएपछि प्रहरीले उनीहरूलाई इलाका ल्याएको थियो ।
प्रहरीको केरकारमा उनीहरूले एउटा ठाउँबाट अर्को ठाउँमा पैसा लगेको जनाएको इन्स्पेक्टर लिम्बूले शब्द एक्सप्रेससँगको कुराकानीमा खुलाए । ‘जनप्रतिनिधि चुनाव प्रचारप्रसारमा हिँड्न नपाउने भए पनि उहाँहरू रकम र प्रचारप्रारको सामग्री नै बोकेर हिँडेको पाइयो,’ उनले भने, ‘प्रहरी कार्यालय ल्याउँदा पैसा भेटिएको थियो । तर, उहाँहरूले पर्सनल पैसा बोकेर हिँडेको बताउनुभएको छ ।’
लिम्बुका अनुसार धान बेचेको रकम लिएर घर जाँदै गरेको उनीहरूले जनाएका छन् ।
आचारसंहिताको उल्लंघन गरेका उनीहरूसहित बरामद रकम र गाडीका विषयमा आइतबार बिहान १० बजेतिर निर्वाचन कार्यालयमा सर्वपक्षीय छलफल हुने प्रहरीले जनाएको छ ।
