झापा— जिल्ला प्रशासन कार्यालय झापाले जिल्लामा मादक पदार्थ (मदिरा) बिक्री–वितरण तथा सेवनमा पूर्ण निषेध लगाएको छ। शुक्रबार सूचना जारी गर्दै प्रशासनले शुक्रबार राति १२ बजेदेखि लागू हुने गरी निर्वाचनको मतगणनाको अन्तिम परिणाम घोषणा नभएसम्म मदिरा बिक्री, वितरण तथा सेवन कार्यमा प्रतिबन्ध लगाइएको जनाएको छ।
कार्यालयका अनुसार गृह मन्त्रालयमार्फत निर्वाचन आयोगबाट प्राप्त निर्देशन तथा बिहीबार बसेको जिल्ला सुरक्षा समितिको निर्णयबमोजिम उक्त कदम चालिएको हो। फागुन २१ गते हुने निर्वाचन स्वच्छ, निष्पक्ष, सुरक्षित र भयरहित वातावरणमा सम्पन्न गराउने उद्देश्यले निर्णय गरिएको सहायक प्रमुख जिल्ला अधिकारी तेजप्रकाश प्रसाईले जानकारी दिए।
प्रशासनले जारी गरेको सूचना उल्लंघन गरी मदिरा बिक्री, वितरण वा सेवन गरेको पाइएमा स्थानीय प्रशासन ऐन २०२८, निर्वाचन (कसुर तथा सजाय) ऐन २०७३ तथा अन्य प्रचलित कानुनबमोजिम कारबाही गरिने चेतावनी दिएको छ।
‘हेभी वेट’ उम्मेदवारको प्रतिस्पर्धाका कारण झापामा सुरक्षा संवेदनशीलता बढेकाले निगरानी कडाइ गरिएको प्रशासनले जनाएको छ।
यसैबीच, जिल्ला प्रशासन कार्यालयले नजिकिँदै गरेको होली पर्व मनाउँदा अपनाउनुपर्ने सावधानीबारे पनि जिल्लावासीलाई सचेत गराएको छ। होलीको बहानामा राजनीतिक नाराबाजी गर्ने, दलका झण्डा, चुनाव चिन्ह, लोगो वा उम्मेदवारका तस्वीर अंकित टि–सर्ट, टोपी, गम्छा वा मास्क उत्पादन, बिक्री–वितरण तथा प्रयोग नगर्न प्रशासनले आग्रह गरेको छ।
