काठमाडौँ– बैतडीमा नेकपा एमाले र राष्ट्रिय स्वतन्त्र पार्टी (रास्वपा)का कार्यकर्ताबीच झडप भएको छ। झडपमा परेर नेकपा एमालेका दुई जना कार्यकर्ता घाइते भएका छन्।
जिल्ला प्रहरी कार्यालय बैतडीका अनुसार डिलासैनी गाउँपालिका–७ को लेक टोलमा चुनाव प्रचार–प्रसारका क्रममा दुवै पक्षबीच विवाद हुँदा झडप भएको हो।
झडपमा परी घाइते हुनेमा डिलासैनी–७ घर भएका एमाले निकट युवा संघका जिल्ला सदस्य अन्दाजी २८ वर्षीय जनक धामी र सोही स्थानका अन्दाजी २६ वर्षीय माधव धामी रहेका छन्। जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहले उक्त जानकारी दिएका हुन्।
प्रहरीका अनुसार जनक धामीको टाउको र निधारमा चोट लागेको छ भने माधव धामीको ढाड र दाहिने खुट्टामा चोट लागेको छ।
घाइते दुवैजनाको उपचार गोकुलेश्वर अस्पतालमा भइरहेको छ। घटनाबारे अनुसन्धान गर्न प्रहरी निरीक्षकको नेतृत्वमा टोली खटिएको जिल्ला प्रहरी कार्यालय बैतडीले जनाएको छ।
