काठमाडौं – प्रधानमन्त्री सुशीला कार्कीले चुनाव बहिष्कार अभियानलाई “सजिलो व्यवसाय”को संज्ञा दिँदै गम्भीर आरोप लगाएकी छन्। ९ फागुनमा बुटवलमा आयोजित कार्यक्रममा उनले संगठन विस्तार नगरी बहिष्कारको हल्ला फिँजाएर चन्दा असुल्ने प्रवृत्ति देखिएको टिप्पणी गरिन्।
प्रधानमन्त्री कार्कीले चुनाव बिथोल्न सक्ने समूहको निगरानी गर्दै कडा सुरक्षा व्यवस्था मिलाउन सुरक्षा निकायलाई निर्देशन दिएकी छन्। सुरक्षा स्रोतका अनुसार हाल विभिन्न १२ समूहलाई सम्भावित सुरक्षा चुनौतीका रूपमा विश्लेषण गरिएको छ।
नेपाल प्रहरीका अनुसार कम्युनिस्ट धारदेखि राजावादी समूहसम्मबाट सुरक्षा चुनौती हुनसक्ने आकलन गरिएको छ। राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईं नेतृत्वको समूह, पूर्वराजा ज्ञानेन्द्र शाह निकट समूह, सीपी गजुरेल नेतृत्वको क्रान्तिकारी कम्युनिस्ट पार्टी तथा धर्मेन्द्र बाँस्तोला नेतृत्वको नेकपा बहुमतलगायत समूहलाई निगरानीमा राखिएको छ।
प्रहरीका अनुसार केही व्यक्तिलाई पक्राउ गरी कानुनी दायरामा ल्याइएको छ। हाल १६ जना हिरासतमा रहेका छन् भने २६ जनालाई नियन्त्रणपछि रिहा गरिएको छ।
निर्वाचन सुरक्षा विश्लेषणका लागि नेपाल प्रहरीले एसएसपी दयानिधि ज्ञवालीको कमान्डमा विशेष महाशाखा गठन गरी देशभरबाट सूचना संकलन र विश्लेषण गरिरहेको जनाएको छ। सम्भावित जोखिमको मूल्याङ्कनपछि सम्बन्धित क्षेत्रमा सुरक्षा रणनीति लागू गरिएको प्रहरी प्रवक्ता डीआईजी अबिनारायण काफ्लेले जानकारी दिएका छन्।
