इटहरी – सुनसरी क्षेत्र नम्बर ३ मा तीन सयभन्दा बढी जेन–जी युवा नेपाल कम्युनिस्ट पार्टी (एमाले)मा प्रवेश गरेका छन्। इटहरीमा आयोजित जेन–जीसँग भेटघाट तथा अन्तरक्रिया कार्यक्रममा सहभागी युवाहरूले प्रतिनिधिसभा उम्मेदवार भगबती चौधरीलाई विजयी गराउने अभियानमा जोडिँदै एमाले रोजेका हुन्।
कार्यक्रममा नवप्रवेशी युवाहरूलाई स्वागत गर्दै उम्मेदवार भगबती चौधरीले जेन–जी पुस्ताका माग र मुद्दाहरू सम्बोधन गर्न सक्षम पार्टी एमाले नै भएको दाबी गरिन्। उनले एमाले देश र जनताको सच्चा पार्टी भएको उल्लेख गर्दै भदौ २३ र २४ गतेपछिको विषम राजनीतिक परिस्थितिमा मुलुकलाई स्थिरताका साथ अघि बढाउन एमालेले निर्णायक भूमिका खेलेको बताइन्।
पछिल्लो समय युवाहरूका आकांक्षा र आवश्यकतालाई केन्द्रमा राखेर घोषणा–पत्र तयार पारिएको उल्लेख गर्दै चौधरीले देशको समग्र विकासका लागि युवामा लगानी अपरिहार्य रहेको धारणा राखिन्। युवालाई स्वदेशमै स्वरोजगार र आत्मनिर्भर बनाउने आफ्नो योजना रहेको उनले स्पष्ट पारिन्।
चौधरीले देशभर ५० हजारभन्दा बढी महिलालाई उद्यमशीलतामा जोडेको, दुई हजारभन्दा बढीलाई रोजगारी उपलब्ध गराएको तथा आफ्नै क्षेत्रमा सयौं गरिब, विपन्न तथा असहाय नागरिकलाई सुरक्षित आवास निर्माण गरिदिएको बताइन्। आगामी दिनमा थप ५ सय घर निर्माण गरिदिने प्रतिबद्धता पनि उनले व्यक्त गरिन्।
कार्यक्रम सुनसरी–३ युवा परिचालन कमिटीको आयोजनामा सम्पन्न भएको हो। कमिटीका अध्यक्ष युवा नेता सबिन श्रेष्ठका अनुसार वडा नम्बर ६ देखि १५ सम्मका युवाहरूको उल्लेख्य सहभागिता रहेको थियो।
सुनसरी–३ का चुनावी कमाण्डर लिलम बस्नेतले भगबती चौधरीलाई ११ हजारभन्दा बढी मतान्तरले विजयी गराउने प्रतिबद्धता व्यक्त गर्दै त्यस अभियानमा युवाहरूको सक्रिय सहभागिता रहने विश्वास व्यक्त गरे। उनले चौधरी जनताको सुख–दुःखमा साथ दिने नेतृ भएकाले पुनः विजयी गराएर पठाउँदा क्षेत्र मात्र नभई समग्र देशकै हित हुने उल्लेख गरे।
