काठमाडौं– दाङको तुलसीपुर–५ स्थित वीरेन्द्र चोकमा रहेको नेपाल कम्युनिस्ट पार्टी (एमाले)को चुनाव चिह्न अंकित झण्डा जलाएको अभियोगमा प्रहरीले थप दुई जनालाई पक्राउ गरेको छ।
दाङ प्रहरीका अनुसार पक्राउ पर्नेमा तुलसीपुर–४ हलवारका ३० वर्षीय रमेश राना मगर र तुलसीपुर–६ गाइडरका २४ वर्षीय विक्रम परियार रहेका छन्।
यसअघि प्रहरीले सोही घटनामा संलग्न भएको आरोपमा बुद्धि बहादुर बस्नेतलाई पक्राउ गरिसकेको थियो। घटनामा संलग्न अन्य व्यक्तिको खोजी कार्य जारी रहेको र पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।
यही फागुन ७ गते राति करिब साढे ९ बजे राष्ट्रिय स्वतन्त्र पार्टी (रास्वपा) को नारा लगाउँदै वीरेन्द्र चोकमा सहभागी केही व्यक्तिले एमालेको चुनाव चिह्न अंकित झण्डा जलाएका थिए।
