विराटनगर । सुनसरी निर्वाचन क्षेत्र नम्बर ४ मा राष्ट्रिय स्वतन्त्र पार्टी (रास्वपा) ले एक महिनामै पाँच वटा राजनीतिक दल परिवर्तन गर्नेलाई उम्मेदवार बनाएको छ ।
रास्वपाले दल ‘अदलबदल’ गर्ने प्रवृत्तिबाट ग्रसित ४९ वर्षीय दीपककुमार साहलाई टिकट दिएपछि पार्टीभित्र आलोचना सुरु भएको छ भने सुनसरी ४ का मतदाताहरूमा संशयसमेत उत्पन्न भएको छ ।
इन्जिनियरसमेत रहेका साहले एक महिनाको छोटो अवधिमै पाँच वटा दल फेरेको तथ्यले मतदाताबीच गम्भीर प्रश्नहरू जन्माएको हो । साहले सिके राउत नेतृत्वको जनमत पार्टीबाट राजनीतिक यात्रा थालेका हुन् ।
गत असोजमा जनमत फुटेपछि साह जनस्वराज पार्टी गठन गरी आफैं अध्यक्ष बसेका थिए । त्यसपछि सर्वोदय पार्टी र उज्ज्यालो नेपाल पार्टी हुँदै अहिले उनले रास्वपाको टिकट पाउन लिएका हुन् ।
अघिल्लो चुनावमा जीवनकुमार श्रेष्ठले रास्वपाबाट चुनाव लडेका थिए । २०७९ सालको निर्वाचनमा श्रेष्ठले ३१ सय ८१ मत ल्याउँदै चौथो स्थान हासिल गरेका थिए । तर, यसपालि रास्वपाका अरू आकांक्षीलाई रोक्दै साहले टिकट हात पारे ।
तर, एक महिनाभित्रै यति धेरै दल फेर्नुले उनको राजनीतिक अडान र वैचारिक स्थिरतामाथि प्रश्न उठाएको छ । स्थानीय राजनीतिक वृत्तमा “रास्वपामा उनी कति दिन टिक्लान्?”, “विचार र दृष्टिकोण बिना केवल टिकट खोज्दै पार्टी चाहार्ने प्रवृत्तिले जनताको विश्वास जित्न सक्ला?” भन्ने प्रश्नहरू उठिरहेका छन् ।
साहसँग स्पष्ट राजनीतिक विचार र दीर्घकालीन अडान नदेखिएको आरोपसमेत लागिरहेको छ ।
यस्तै, रास्वपाको लोकप्रियता, विशेषगरी पार्टी सभापति रवि लामिछाने र काठमाडौँ महानगर प्रमुख बालेन शाहको चर्चाले मात्र चुनाव जित्न सकिन्छ कि उम्मेदवारको आफ्नै सोच, विचार र प्रतिबद्धता पनि आवश्यक पर्छ भन्ने विषयमा मतदाताबीच बहस चर्किएको छ ।
पहिलोपटक संसदीय चुनावी प्रतिस्पर्धामा होमिएका साहलाई सुनसरी–४ का मतदाताले विश्वास गरेर मत दिने कि नदिने भन्ने प्रश्न अहिले निर्वाचनको केन्द्रीय बहसको विषय बनेको छ ।
फागुन २१ मा हुने प्रतिनिधिसभा सदस्य निर्वाचनका लागि सुनसरी क्षेत्र नं ४ मा ३३ जना उम्मेदवार चुनावी प्रतिस्पर्धा रहेका छन् । यस क्षेत्रमा १७ जना विभिन्न दलबाट र १६ जना स्वतन्त्र उम्मेदवारहरू चुनावी प्रतिष्पर्धामा छन् ।
यहाँबाट साहसँगै नेपाली कांग्रेसका ज्ञानेन्द्रबहादुर कार्की, नेकपा एमालेले जगदीशप्रसाद कुसियैत, नेपाली कम्युनिष्ट पार्टीका महमद महफुज अन्सारी र राष्ट्रिय प्रजातन्त्र पार्टी (राप्रपा) ले प्रेमप्रसाद भट्टराईले चुनावी प्रतिस्पर्धा गर्दै छन् ।
प्रतिनिधिसभा निर्वाचन २०७९ मा यहाँबाट कार्की झिनो (११०) मतले निर्वाचित भएका थिए । त्यसअघि २०७४ सालको निर्वाचनमा भने उनी आफ्ना निकटतम् प्रतिद्वन्द्वीभन्दा झन्डै सात हजार मतले निर्वाचित भएका थिए ।
