इनरुवा । सुनसरी निर्वाचन क्षेत्र नम्बर ४ का प्रतिनिधिसभा सदस्यका उम्मेदवार ज्ञानेन्द्रबहादुर कार्कीले आसन्न निर्वाचन विगतका भन्दा फरक रहेको बताएका छन् । सुनसरी–४ मा आयोजित होली मिलन कार्यक्रमलाई सम्बोधन गर्दै कार्कीले यो निर्वाचनले मुलुकमा स्थायित्व कायम हुने कि नहुने भन्ने निक्र्यौल गर्ने बताए ।
जनताको भावनअनुसार विकास र समृद्धिको यात्रामा अगाडि बढाउने फैसला यो निर्वाचनले गर्ने बताउँदै चेतनशील र जागरुक मतदाताले सही नेतृत्व चुन्नका लागि मतदान गर्न आग्रह गरे । युगान्तकारी राजनीतिक परिवर्तन गर्नका लागि नेपाली कांग्रेसले ऐतिहासिक भूमिका निर्वाह गरेको बताउँदै कांग्रेसकै कारण दक्षिण एसियामा नेपालमा अभिव्यक्ति स्वतन्त्रता कायम रहेको बताए ।
साथै, उनले दक्षिण एसियामै नेपाललाई आर्थिक समृद्ध बनाउनुपर्ने विचार राखे । त्यसका लागि सुध्रिएको कांग्रेसका उम्मेदवारहरूलाई मतदान गर्नुपर्नेमा जोड दिए ।
अर्थमन्त्री, ऊर्जा जलस्रोत तथा सिँचाइमन्त्री, कानुन, न्याय तथा संसदीय मामिलामन्त्री र सञ्चार तथा सूचना प्रविधिमन्त्री भएर जिम्मेवारी बहन गरिसकेका कार्की कांग्रेसको विशेष महाधिवेशनपछि निवर्तमान केन्द्रीय सदस्य हुन् ।
विशेष महाधिवेशनपछि चयन भएको कांग्रेसको नयाँ नेतृत्वले उनलाई आसन्न प्रतिनिधिसभा निर्वाचनमा फेरि सुनसरी–४ मा उम्मेदवार बनाएको हो । यहाँबाट नेकपा एमालेबाट जगदिशप्रसाद कुसियैत र नेपाली कम्युनिस्ट पार्टीबाट महमद महफुज अन्सरी उम्मेदवारी दिएका छन् ।
राष्ट्रिय स्वतन्त्र पार्टी (रास्वपा) ले सुनसरी–४ का लागि दीपककुमार साह र राष्ट्रिय प्रजातन्त्र पार्टी (राप्रपा) ले प्रेमप्रसाद भट्टराईलाई उम्मेदवार बनाएको छ । कांग्रेस नेता कार्की उम्मेदवार रहेको सुनसरी–४ मा १७ जना विभिन्न दलबाट र १६ जना स्वतन्त्र उम्मेदवारहरू चुनावी प्रतिष्पर्धामा छन् ।
प्रतिनिधिसभा निर्वाचन २०७९ मा कार्की यही क्षेत्रमा झिनो (११०) मतले निर्वाचित भएका थिए । त्यसअघि २०७४ सालको निर्वाचनमा भने उनी आफ्ना निकटतम् प्रतिद्वन्द्वीभन्दा झन्डै सात हजार मतले निर्वाचित भएका थिए ।
