सुनसरी । फागुन २१ गते हुन गइरहेको प्रतिनिधिसभा निर्वाचनको समय नजिकिँदै गर्दा सुनसरी निर्वाचन क्षेत्र नं. ३ मा नेकपा (एमाले) की उम्मेदवार भगवती चौधरीले आफ्नो सक्रियता बढाएकी छन् ।
निवर्तमान सांसदसमेत रहकी चौधरीका पक्षमा जनलहर बढेसँगै उनी यतिबेला आफ्नो निर्वाचन क्षेत्रका जनताबीच सल्लाह सुझावहरू संकलनमा ब्यस्त बनेकी छन् ।
चौधरीको सक्रियतामा शनिबार मात्रै दुहवी नगरपालिका-९ मा ५२ जना महिलाहरूले एकसाथ नेपाली कांग्रेस परित्याग गरी एमालेमा प्रवेश गरेका छन् ।
पार्टी प्रवेश कार्यक्रममा नव प्रवेशीहरूलाई सम्बोधन गर्दै उम्मेदवार चौधरीले समाज रूपान्तरण र महिला सशक्तीकरणका लागि राजनीतिमा महिला सहभागीता अपरिहार्य भएको बताइन् ।
नेकपा एमालेले महिलाहरूको हक अधिकार सुनिश्चित गर्न प्रतिबद्ध रहेको उनले जिकिर गरिन् ।
‘नेकपा एमाले विचार सिद्धान्त र जनताको पक्षमा उभिएको पार्टी हो, लैङिक समानता, सामाजिक न्याय र आत्मनिर्भर अर्थतन्त्रका पक्षमा उभिएको पार्टी हो । महिलाहरूलाई राज्यका सबै क्षेत्रमा अवसर दिन एमाले प्रतिबद्ध छ ।’ उम्मेदवार चौधरीले भनिन् ।
पार्टी प्रवेश गर्दै महिलाहरूले आफूहरू एमालेले अंगिकार गरेको राष्ट्र, राष्ट्रियता, स्वाधिनता, जाति, वर्ग, समुदायको उत्थानका सिद्धान्त र विचारबाट प्रभावित भएको तथा नेतृ चौधरीले महिला सशक्तीकरणका सवालमा निर्वाह गरेको भूमिकाबाट प्रभावित भएर पार्टी प्रवेश गरेको बताए ।
त्यसो त, सुनसरी क्षेत्र नं. ३ मा चौधरीप्रति जनताको उत्साहजनक समर्थन रहेको छ । सामाजिक कामसँगै राजनीतिमा उदाएकी चौधरीले साढे तीन वर्ष सांसद तथा करिब ५ महिना मन्त्री भएर आफ्नो क्षेत्रका लागि गरेको कामबाट मतदाता सन्तुष्ट देखिएका छन् ।
निर्वाचन क्षेत्रको इटहरी उपमहानगरपालिका, दुहबी नगरपालिका, गढी तथा बर्जु गाउँपालिकाका गाउँगाउँ जनताका गुनासा र समस्याहरू पहिचान गर्न जाँदै गर्दा मतदाताहरूले सकारात्मक प्रतिक्रियासँगै पुनः एक पटक निर्वाचित गराएर पठाउने प्रतिबद्धता नै व्यक्त गरेपछि उम्मेदवार चौधरी पनि उत्साहित देखिएकी छन् ।
चौधरीले स्थानीय विकासका एजेण्डासँगै उद्यमशीलता, युवा स्वरोजगार र आत्मनिर्भर अर्थतन्त्र जस्ता जनप्रिय एजेण्डाहरू अगाडी सारेकोले यो क्षेत्रका मतदाताहरू मत परिवर्तनको विपक्षमा देखिएको नेकपा एमाले निर्वाचन क्षेत्र नं. ३ परिचालन समितिका संयोजक लिलम बस्नेतले बताए ।
