विराटनगर । मोरङ निर्वाचन क्षेत्र नम्बर ४ बाट नेकपा (एमाले) का उम्मेदवार जीवन घिमिरेले आफ्नो चुनावी प्रतिबद्धता पत्र सार्वजनिक गरेका छन् ।
आगामी फागुन २१ गते हुने प्रतिनिधिसभा निर्वाचनका लागि उनले आफू प्रदेश सांसद र मन्त्री रहँदा गरेका कामको फेहरिस्त र आगामी ३३ बुँदे योजना प्रस्तुत गरेका हुन् ।
विराटनगरमा शुक्रबार पत्रकार सम्मेलन गर्दै घिमिरेले यस क्षेत्रको भौतिक पूर्वाधार, कृषि, स्वास्थ्य र खेलकुदलाई मुख्य प्राथमिकतामा राखेका छन् ।
आफूलाई विकासप्रेमी नेताका रूपमा प्रस्तुत गर्दै घिमिरेले प्रतिबद्धता पत्रमा सबैभन्दा चर्चाको विषय बैजनाथपुर रंगशालाको स्तरोन्नतिलाई पनि समावेश गरेका छन् ।
घिमिरेले आफ्नो प्रतिबद्धता पत्रमा वैजनाथपुर रंगशालालाई स्तरउन्नति गरी पूर्ण क्षमतामा सञ्चालन गर्ने विषयलाई पहिलो प्राथमिकतामा राखेका छन् । यद्यपि, यो रंगशालाको नामकरण र बजेटलाई लिएर भने राजनीतिक वृत्तमा फरक बहस सुरु भएको छ ।
अघिल्लो सरकारले उक्त रंगशालाको नाम ‘गिरिजाप्रसाद कोइराला क्रिकेट रंगशाला’ राखेको थियो भने पुष्पकमल दाहाल ‘प्रचण्ड’ नेतृत्वको सरकारले यसलाई राष्ट्रिय गौरवको योजनामा समावेश गरी बजेट समेत विनियोजन गरेको थियो ।
तर, घिमिरेको प्रतिबद्धता पत्रमा रंगशालाको नाम ‘वैजनाथपुर’ नै उल्लेख गरिएको छ, जसले उनले अघिल्लो सरकारले गरेको नामकरणलाई स्वीकार नगरेको प्रष्ट देखिन्छ ।
यति मात्र होइन, नेकपा एमालेका अध्यक्ष केपी शर्मा ओली प्रधानमन्त्री भएको समयमा उक्त रंगशालाका लागि छुट्याइएको बजेट कार्यान्वयन नगरी कटौती गरिएको भन्दै विपक्षीहरूले आलोचना समेत गर्दै आएका छन् ।
आफ्नो कार्यकालमा नेपालकै पहिलो मनमोहन प्राविधिक विश्वविद्यालयको स्थापना, विद्यालय नर्सिङ कार्यक्रमको सुरुवात र १५ दिनभित्र अत्याधुनिक कोभिड अस्पताल निर्माण गरी हजारौँको ज्यान जोगाएको जस्ता उपलब्धिलाई प्रमुख रूपमा अघि सारेका छन् ।
उनले विराटनगरको सहिद रंगशालामा रात्रिकालीन खेलका लागि फ्लडलाइट जडान, कोशी प्रदेशमा ‘एक पालिका एक खेल मैदान’ र घरेलु हिंसा नियन्त्रण ऐन निर्माणलाई आफ्नो कार्यकालका सफल कार्यका रूपमा प्रस्तुत गरे ।
जेष्ठ नागरिकलाई दन्त उपहार, अपाङ्गता रोकथाम कार्यक्रम र राधाकृष्ण रथयात्रामा हेलिकोप्टरबाट पुष्पवृष्टि गर्ने परम्पराको थालनी पनि उनकै पालामा भएको उनले दाबी गरे ।
आगामी योजनामा घिमिरेले कृषि, स्वास्थ्य र पूर्वाधारलाई विशेष जोड दिएका छन् । कटहरी, ग्रामथान र बेलबारीलाई तरकारी पकेट क्षेत्र बनाउने, झोराहाटमा कोल्ड स्टोर निर्माण गर्ने र तमोर–चिसाङ डाइभर्सन परियोजना अघि बढाउने उनको योजना छ ।
यस्तै, बेलबारी, ग्रामथान र कटहरीमा १०० बेडको अस्पताल स्थापना गर्ने, कोशी कोभिड अस्पताललाई पूर्ण क्षमतामा चलाउने र स्वास्थ्य बिमा सुविधालाई पुनः १ लाख रुपैयाँ कायम गराउने प्रतिबद्धता उनले व्यक्त गरे ।
पूर्वाधारतर्फ विराटनगर रिङरोडको बाँकी काम पुरा गर्ने, कटहरीमा रेलवे स्टेसन निर्माण गरी रेल सेवा सञ्चालन गर्ने र सुकुम्बासी समस्या समाधानका लागि जग्गा धनीपुर्जा वितरण गर्ने विषयलाई उनले प्राथमिकतामा राखेका छन् ।
भ्रष्टाचार नियन्त्रण, विराटनगरमा आइटी हबको निर्माण र विभिन्न खोलाहरूमा तटबन्धको व्यवस्था गर्ने जस्ता योजनासहित घिमिरेले आफूलाई विकासप्रेमी उम्मेदवारका रूपमा प्रस्तुत गरेका छन् ।
