काठमाडौं — त्रिभुवन अन्तर्राष्ट्रिय विमानस्थल र आसपास क्षेत्रमा एक महिनासम्म निषेधाज्ञा जारी गरिएको छ। काठमाडौंका प्रमुख जिल्ला अधिकारी (प्रजिअ) ईश्वरराज पौडेलले बिहीबार विज्ञप्ति जारी गर्दै उक्त निर्णयबारे जानकारी दिएका हुन्।
प्रशासनका अनुसार फागुन १ गते विमानस्थल क्षेत्रमा कार्यक्रम, प्रदर्शन तथा स्वागत र्याली गर्नेबारे विभिन्न समूह र राजनीतिक दलले सामाजिक सञ्जालमार्फत आह्वान गरेको पाइएपछि सुरक्षा संवेदनशीलतालाई ध्यानमा राख्दै निषेधाज्ञा जारी गरिएको हो। राप्रपाका केही नेता तथा दुर्गा प्रसाईंलगायतले पूर्वराजा ज्ञानेन्द्र शाह झापाबाट काठमाडौं फर्कंदा विमानस्थलमा स्वागत गर्ने घोषणा गरेका थिए।
प्रजिअ पौडेलले यस्ता कार्यक्रमका लागि प्रशासनसँग पूर्वस्वीकृति नलिइएको उल्लेख गर्दै अन्तर्राष्ट्रिय विमानस्थलजस्तो अत्यन्त संवेदनशील क्षेत्रमा भीडभाड, प्रदर्शन, धर्ना, जुलुस वा सभा हुँदा तोडफोड, आगजनी, भिडन्त तथा हुलदंगा जस्ता अवाञ्छित गतिविधि हुन सक्ने जोखिम रहेको बताएका छन्। यसबाट अत्यावश्यक सेवा, सार्वजनिक यातायात, सार्वजनिक सम्पत्ति तथा समग्र शान्ति–सुरक्षामा गम्भीर असर पर्न सक्ने प्रशासनको भनाइ छ।
जारी आदेशअनुसार विमानस्थल प्रवेश गर्ने गोल्डेन गेटदेखि विमानस्थल हाताभित्रका सम्पूर्ण सडक, आन्तरिक र अन्तर्राष्ट्रिय टर्मिनल क्षेत्र, पार्किङ क्षेत्रलगायतका स्थानमा पाँच जनाभन्दा बढी व्यक्ति भेला भई अनसन, धर्ना, घेराउ, जुलुस, प्रदर्शन वा सभा गर्न निषेध गरिएको छ।
स्थानीय प्रशासन ऐन, २०२८ को दफा ६ उपदफा (३क) बमोजिम २०८२ माघ २९ गतेदेखि लागू हुने गरी अर्को व्यवस्था नभएसम्म एक महिनासम्मका लागि निषेधाज्ञा जारी गरिएको प्रशासनले जनाएको छ।
यद्यपि निषेधाज्ञा लागू गरिएको क्षेत्र बाहेकका स्थानमा संविधानअनुसार नागरिकको विचार तथा अभिव्यक्तिको स्वतन्त्रता र शान्तिपूर्ण भेला हुने अधिकारप्रति प्रशासन प्रतिबद्ध रहेको पनि विज्ञप्तिमा उल्लेख छ।
