विराटनगर — राष्ट्रिय युवा संघ नेपाल, मोरङ जिल्ला कमिटीको विस्तारित बैठकले सलमान सेखलाई क्षेत्र नं. ५ को संयोजकमा चयन गरेको छ।
वडा नं. १७ का सदस्यका रूपमा संगठनमा यात्रा सुरु गरेका सेख निरन्तर सक्रियता, अनुशासन र युवामाझको लोकप्रियताका आधारमा क्षेत्रीय नेतृत्वको जिम्मेवारीमा पुगेका हुन्। जिल्ला कमिटीका अनुसार संगठनप्रति उनको समर्पण र कार्यशैलीलाई मूल्यांकन गर्दै उक्त जिम्मेवारी दिइएको हो।
विस्तारित बैठकमा युवाहरूलाई संगठनमार्फत सामाजिक रूपान्तरण, राष्ट्र निर्माण तथा लोकतान्त्रिक मूल्य संरक्षणमा सक्रिय बनाउने विषयमा व्यापक छलफल गरिएको थियो। साथै बैठकले आगामी दिनमा क्षेत्र नं. ५ भित्र संगठन विस्तार, सदस्यता वृद्धि तथा युवामुखी कार्यक्रमलाई थप प्रभावकारी बनाउने निर्णय समेत गरेको छ।
नवनियुक्त संयोजक सेखले आफूलाई दिइएको जिम्मेवारीलाई इमान्दारीपूर्वक पूरा गर्ने प्रतिबद्धता व्यक्त गर्दै युवाहरूको हक, अधिकार र आवाजलाई सशक्त रूपमा उठाउने बताएका छन्।
बैठकमा जिल्ला तथा क्षेत्रीय तहका पदाधिकारी, कार्यकर्ता तथा युवा प्रतिनिधिहरूको उल्लेखनीय उपस्थिति रहेको थियो।
