काठमाडौं — सेयर बजारमा गिरावटको क्रम मंगलबार पनि रोकिएन। सोमबार दोहोरो अंकले घटेको नेपाल स्टक एक्सचेन्ज (नेप्से) परिसूचक मंगलबार पुनः १०.२५ अंकले घट्दै २६६२.१४ अंकमा झरेको छ।
साताको पहिलो दिन आइतबारदेखि नै नेप्से सूचकसँगै कारोबार रकम पनि लगातार घट्दै गएको नेप्सेले जनाएको छ। बजारमा लगानीकर्ताको मनोबल कमजोर देखिँदा सूचक र कारोबार दुवैमा दबाब परेको विश्लेषण गरिएको छ।
मंगलबार कारोबार सुरु हुँदा २६७२.३९ अंकमा रहेको नेप्से, दिनभर उतारचढावबीच अन्ततः नकारात्मक विन्दुमा बन्द भएको हो। बजारमा सूचीकृत अधिकांश कम्पनीको सेयर मूल्य घटेपछि समग्र परिसूचक ओरालो लागेको देखिएको छ।
यस दिन नेप्सेमा कारोबार भएका १ सय ७९ कम्पनीको सेयर मूल्य घटेको छ भने ७४ कम्पनीको मूल्य बढेको छ। सात कम्पनीको सेयर मूल्य भने स्थिर रहेको नेप्सेले जनाएको छ।
समूहगत सूचकतर्फ पनि अधिकांश क्षेत्रमा गिरावट देखिएको छ। बैंकिङ समूह १.३२ अंकले घट्दा विकास बैंक ६५.६७ र वित्त समूह २२.७१ अंकले ओरालो लागेको छ। होटल तथा पर्यटन ३५.६५, जलविद्युत् ९.०५, लगानी ०.५६, जीवन बीमा ९८.४४, उत्पादनमूलक ५९.७०, लघुवित्त २४.१७, निर्जीवन बीमा ६८.५६ तथा अन्य समूह ८.२३ अंकले घटेका छन्।
यद्यपि सामूहिक लगानी कोष समूह ०.०४ र व्यापार समूह १९.७० अंकले बढ्दै सकारात्मक देखिएका छन्।
कारोबारतर्फ मंगलबार नेप्सेमा ३२४ कम्पनीका ८९ हजार ८ सय ३६ कारोबारबाट २ करोड १७ लाख १५ हजार ८ सय ६८ कित्ता सेयर खरिद–बिक्री हुँदा कुल कारोबार रकम ८ अर्ब ६१ करोड रुपैयाँमा सीमित भएको छ।
यो कारोबार रकम अघिल्लो दिनको तुलनामा कम हो। सोमबार नेप्सेमा १० अर्ब रुपैयाँभन्दा बढीको सेयर कारोबार भएको थियो।
