काठमाडौं । राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन)को घरमा चोरी गरेको आरोपमा तीन जनालाई प्रहरीले पक्राउ गरेको छ।
जिल्ला प्रहरी परिसर काठमाडौंको टोलीले उनीहरूलाई पक्राउ गरेको हो। परिसरका एसपी तथा प्रवक्ता पवनकुमार भट्टराईले तीन जनालाई पक्राउ गरिएको पुष्टि गर्दै उनीहरूबाट केही सामग्री बरामद गरिएको जानकारी दिए।
‘तीन जनालाई पक्राउ गरेका छौं। उनीहरूबाट केही सामानहरू पनि बरामद भएका छन्,’ एसपी भट्टराईले बताए।
प्रहरीका अनुसार पक्राउ परेकाहरूबाट ल्यापटप, त्यसको चार्जर र भिडियो रेकर्डर बरामद गरिएको छ। चोरी घटनामा संलग्न मुख्य व्यक्ति जेनजी आन्दोलनका क्रममा २४ भदौमा नख्खु कारागारबाट फरार रहेका व्यक्ति रहेको प्रहरीले जनाएको छ।
प्रहरीले घटनाबारे थप अनुसन्धान जारी रहेको जनाउँदै हाल विस्तृत विवरण सार्वजनिक नगरेको छ।
