काठमाडौैं– आईसीसी टी–२० विश्वकपको १०औँ संस्करण आजदेखि भारत र श्रीलङ्कामा सुरु हुँदैछ। प्रतियोगिताको उद्घाटन खेल श्रीलङ्काको कोलम्बोस्थित सिंहाली स्पोर्ट्स क्लब क्रिकेट मैदानमा हुनेछ।
उद्घाटन खेलमा पाकिस्तान र नेदरल्याण्ड्सबीच प्रतिस्पर्धा हुनेछ। उक्त खेल नेपाली समयअनुसार बिहान सवा ११ बजे सुरु हुनेछ।
आजै दिउँसो सवा ३ बजे भारतको इडेन गार्डेनमा वेस्ट इन्डिज र स्कटल्याण्डबीच खेल हुनेछ भने सवा ७ बजे आयोजक भारत र अमेरिकाबीच मुम्बईस्थित वानखेडे रंगशालामा प्रतिस्पर्धा हुनेछ।
टी–२० विश्वकपमा नेपालले भोलि (आइतबार) आफ्नो पहिलो खेल खेल्नेछ। नेपालले दुईपटकको च्याम्पियन इंग्ल्यान्डसँग मुम्बईको वानखेडे रंगशालामा खेल्दै प्रतियोगिताको सुरुवात गर्नेछ। नेपाल र इंग्ल्यान्डबीचको खेल नेपाली समयअनुसार दिउँसो ३:१५ बजे सुरु हुनेछ।
नेपालले दोस्रो खेल २९ माघमा इटालीसँग खेल्नेछ। इटाली पहिलोपटक टी–२० विश्वकप खेल्दैछ। त्यसपछि नेपालले २ फागुनमा पूर्वविजेता वेस्ट इन्डिज र ४ फागुनमा स्कटल्यान्डसँग प्रतिस्पर्धा गर्ने तालिका छ।
प्रतियोगितामा २० टोली सहभागी छन्, जसलाई चार समूहमा विभाजन गरिएको छ। समूह ‘ए’ मा भारत, पाकिस्तान, अमेरिका, नामिबिया र नेदरल्याण्ड्स छन्। समूह ‘बी’ मा अस्ट्रेलिया, श्रीलङ्का, जिम्बावे, आयरल्यान्ड र ओमान रहेका छन्। समूह ‘सी’ मा नेपाल, इंग्ल्यान्ड, वेस्ट इन्डिज, स्कटल्यान्ड र इटाली छन् भने समूह ‘डी’ मा दक्षिण अफ्रिका, न्युजिल्यान्ड, अफगानिस्तान, संयुक्त अरब इमिरेट्स (यूएई) र क्यानडा छन्।
प्रतियोगिता आगामी मार्च ८ सम्म सञ्चालन हुनेछ।
