काठमाडौँ । निर्वाचन आयोगले उम्मेदवार तथा राजनीतिक दलहरूले निर्वाचन प्रयोजनका लागि शुभेच्छुक र समर्थकहरूबाट स्वेच्छिक सहयोग लिन पाउने स्पष्ट पारेको छ।
आयोगका प्रवक्ता नारायणप्रसाद भट्टराईले प्रचलित कानुनको परिधिभित्र रहेर निर्वाचन प्रचार–प्रसारका लागि सहयोग संकलन गर्न कुनै बाधा नरहेको बताएका हुन्।
प्रवक्ता भट्टराईका अनुसार उम्मेदवार वा राजनीतिक दलले कसैलाई पनि निश्चित रकम तोकेर चन्दा माग्न भने पाउने छैनन्।
‘हामीसँग चन्दा ऐन छ। निर्वाचन र प्रचार–प्रसारका लागि शुभेच्छुक तथा समर्थकबाट सहयोग लिन सकिन्छ,’ उनले भने, ‘तर उम्मेदवार वा दलले मलाई यति रकम दिनुपर्छ भनेर कसैलाई तोकेर माग्न पाइँदैन। स्वेच्छाले दिन चाहनेले निर्वाचन प्रयोजनका लागि खोलिएको खातामा सहयोग गर्न सक्छन्।’
उनले उम्मेदवारले निर्वाचन प्रयोजनका लागि अनिवार्य रूपमा छुट्टै बैंक खाता खोल्नुपर्ने व्यवस्था रहेको उल्लेख गर्दै उक्त खातामा संकलित रकम व्यक्तिगत प्रयोजनमा खर्च गर्न नपाइने स्पष्ट पारे।
‘छुट्टै खाता खोलिएको कारणले संकलित सहयोग निर्वाचन प्रचार–प्रसारकै लागि प्रयोग हुन्छ भन्ने विश्वास गर्नुपर्छ। यदि दुरुपयोग भएको पाइएमा त्यसको सम्बोधन गरिन्छ,’ प्रवक्ता भट्टराईले भने।
यसैबीच, उनले हालसम्म ८४ लाख ४० हजार मतपत्र छपाइ भइसकेको जानकारी दिए। तीमध्ये ७ हजार १३७ वटा मतपेटिका प्याकिङ भइसकेको आयोगले जनाएको छ।
प्रवक्ता भट्टराईका अनुसार ३२ जिल्लाका लागि आवश्यक पर्ने मतपत्रको छपाइ तथा प्याकिङ कार्य पूर्ण रूपमा सम्पन्न भइसकेको छ। बाँकी जिल्लाका मतपत्र छपाइ र व्यवस्थापनको काम पनि युद्धस्तरमा भइरहेको आयोगले जनाएको छ।
