सुनसरी । सुनसरी निर्वाचन क्षेत्र नं. ४ मा नेपाली कांग्रेसभित्र केही समयदेखि देखिँदै आएको आन्तरिक असन्तुष्टि औपचारिक रूपमा अन्त्य भएको छ। प्रत्यक्ष र समानुपातिक उम्मेदवार चयनलाई लिएर उत्पन्न मतभेद आपसी संवाद र सहमतिमार्फत समाधान भएको कांग्रेस स्रोतले जनाएको छ।
यस क्षेत्रबाट प्रतिनिधिसभा निर्वाचनका लागि हरिनगर गाउँपालिकाका अध्यक्ष गफार अंसारीले उम्मेदवारी पाउने अपेक्षा गरेका थिए। स्थानीय तहमा प्रभावशाली नेताका रूपमा चिनिएका अंसारी चुनावी तयारीमा जुटिरहेका बेला पार्टीको केन्द्रीय निर्णयअनुसार पूर्वमन्त्रीसमेत रहेका ज्ञानेन्द्रबहादुर कार्कीलाई उम्मेदवार बनाइएपछि उनी असन्तुष्ट बनेका थिए। त्यसपछि केही समय कांग्रेसको स्थानीय संगठनभित्र मतभेद र असहजता देखिएको थियो।
उक्त असन्तुष्टिले चुनावी अभियानमा नकारात्मक असर पर्न सक्ने आशंका बढिरहेका बेला पार्टी नेतृत्व तथा स्थानीय नेताहरूको पहलमा संवाद प्रक्रिया अघि बढाइएको थियो। सोही क्रममा उम्मेदवार कार्की र अध्यक्ष अंसारीबीच पटक–पटक छलफल भई अन्ततः सहमति कायम भएको स्रोतको दाबी छ।
सहमति अनुसार दुवै नेताले व्यक्तिगत असन्तुष्टि थाती राख्दै पार्टी हितलाई प्राथमिकतामा राखेर अघि बढ्ने समझदारी गरेका छन्। सहमति पश्चात् अंसारीले कांग्रेसको आधिकारिक उम्मेदवारलाई सक्रिय सहयोग गर्ने प्रतिबद्धता जनाएका छन् भने कार्कीले पनि स्थानीय नेतृत्व र कार्यकर्ताको भूमिकालाई सम्मान गर्दै साझा चुनावी अभियान सञ्चालन गर्ने बताएका छन्।
यस सहमतिले पार्टीभित्र एकताको सन्देश प्रवाह भएको कांग्रेस कार्यकर्ताहरूको प्रतिक्रिया छ। आन्तरिक विवाद समाधानसँगै सुनसरी–४ मा नेपाली कांग्रेसको चुनावी रणनीति थप स्पष्ट र सशक्त बन्दै गएको देखिन्छ।
संगठन एकताबद्ध हुँदा मतदाता समक्ष सकारात्मक सन्देश जाने र चुनावी प्रतिस्पर्धामा कांग्रेसलाई लाभ पुग्ने स्थानीय राजनीतिक विश्लेषकहरूको आकलन छ। अब कांग्रेसले आन्तरिक एकतालाई मजबुत बनाउँदै विकास, स्थायित्व र प्रतिनिधित्वका मुद्दालाई केन्द्रमा राखेर चुनावी मैदानमा उत्रिने तयारी गरेको बुझिएको छ।
