विराटनगर । मोरङ निर्वाचन क्षेत्र नम्बर २ का स्वतन्त्र उम्मेदवार राजन निरौलाले सम्पर्क कार्यालय स्थापना गरेका छन् । आसन्न प्रतिनिधिसभा सदस्य निर्वाचनको तयारीमा रहेका निरौलाले बुधबार एक कार्यक्रमका बीच सम्पर्क कार्यालय स्थापना गरेका हुन् ।
रतुवामाई नगरपालिका–६ आम्बाडीमा आयोजित कार्यक्रममा सम्पर्क कार्यालय स्थापना गर्दै निरौलाले चुनाब चिह्नसमेत सार्वजनिक गरेका हुन् । साथै, उनले युवराज अधिकारीको संयोजकत्वमा चुनावी प्रचार–प्रसार समिति गठन गरेका हुन् ।
चुनाब चिह्न आँप लिएर चुनावी मैदानमा होमिएका निरौलाले आगामी फागुन २१ गते हुने संसदीय निर्वाचनमा प्रतिस्पर्धा गर्न लागेका छन् । गरिबको आवाज, किसानको भरोसा, श्रमको मूल्य र श्रमिको सम्मान नारा लिएर उनी चुनाव लड्दै छन् ।
यस क्षेत्रमा नेपाली कांग्रेसका मीनेन्द्र रिजाल, नेकपा एमालेका दिलीप बगडिया, राष्ट्रिय स्वतन्त्र पार्टीका कृष्णकुमार कार्कीलगायत १७ जनाले चुनावी मैदानमा छन् ।
यसअघि २०७४ सालको निर्वाचनमा मोरङ–२ मा एमालेका ऋषिकेश पोखरेलले कांग्रेसकी सुजाता कोइरालालाई पराजय गरेका थिए । त्यसअघि २०७९ मा भने कांग्रेसका मीनेन्द्र रिजालले ऋषिकेशलाई पराजित गरेका थिए ।
