काठमाडौं । नेपाल स्टक एक्स्चेन्ज (नेप्से) परिसूचक बुधबार पनि घट्ने क्रममै रहेको छ । मंगलबार १२ अंकले घटेको नेप्से बुधबार थप १.६४ अंकले घट्दै २६८१.५० बिन्दुमा बन्द भएको हो ।
नेप्से घटे पनि बुधबार ४ कम्पनीको सेयर मूल्य १० प्रतिशतसम्म बढेर सकारात्मक सर्किट लागेको छ । सकारात्मक सर्किट लाग्ने कम्पनीमा कालिञ्चोक दर्शन लिमिटेड, सुपर माई हाइड्रोपावर, सुपर मादी हाइड्रोपावर र आँखुखोला जलविद्युत् कम्पनी रहेका छन् । कारोबार रकमका आधारमा आँखुखोला जलविद्युत् सबैभन्दा बढी कारोबार हुने कम्पनी बनेको छ ।
नेप्सेसँगै सेन्सिटिभ इन्डेक्स पनि ०.७० अंकले घटेको छ । बुधबार कारोबार भएका कम्पनीहरूमध्ये १३४ कम्पनीको सेयर मूल्य घटेको छ भने ११३ कम्पनीको मूल्य बढेको छ । १३ कम्पनीको सेयर मूल्य स्थिर रहेको छ ।
समूहगत सूचकतर्फ बैंकिङ समूह ४.५६ अंकले घट्दा जीवन बीमा १७.१९, उत्पादनमूलक ४९.६४, लघुवित्त १५.१४, सामूहिक लगानी कोष ०.०६ र अन्य समूह ७.२५ अंकले घटेका छन् ।
यता विकास बैंक समूह ६.०७, वित्त २३.३३, होटल तथा पर्यटन १४.०८, जलविद्युत् १३.४०, लगानी ०.०९, निर्जीवन बीमा १५.१८ र व्यापार समूह १८.९१ अंकले बढेका छन् ।
बुधबार नेप्सेमा ३२६ कम्पनीको ८० हजार ४२२ कारोबारमार्फत ७ अर्ब ४९ करोड रुपैयाँ बराबरको १ करोड ६६ लाख ८२ हजार कित्ता सेयर किनबेच भएको छ । यो कारोबार रकम मंगलबारको तुलनामा कम हो । मंगलबार नेप्सेमा साढे ८ अर्ब रुपैयाँ बराबरको सेयर कारोबार भएको थियो ।
