विराटनगर। राष्ट्रिय स्वतन्त्र पार्टीका सभापति रवि लामिछाने सामान्य चोटबाट सुरु भएको संक्रमणका कारण केही दिन अस्पतालमा उपचाररत रहेपछि पुनः सार्वजनिक जीवनमा फर्किएका छन्। स्वास्थ्यमा सुधार आएपछि उनले देशव्यापी रूपमा जनतासँग प्रत्यक्ष संवाद गर्ने घोषणा गरेका छन्।
सार्वजनिक सन्देशमार्फत लामिछानेले अब देशमा हुने घटनाहरू केवल क्षणिक नभई इतिहास बन्ने दाबी गरेका छन्। उनका अनुसार परिवर्तनको इतिहास नेपाली जनताले आफ्नै मतपत्रमार्फत लेख्नेछन्। “अब जे हुन्छ, त्यो घटना होइन—इतिहास हुनेछ,” उनले भनेका छन्।
उनले विगतमा दुईतिहाइको सरकारले आफूविरुद्ध गरेका कदमलाई ‘जबरजस्ती हालिएको विष’ को संज्ञा दिँदै देशभरका अदालत धाउँदै त्यसको प्रतिकार गरेको उल्लेख गरेका छन्। यद्यपि, अदालत यात्रा मात्र होइन, जनसमुदायसँग प्रत्यक्ष संवाद नै आफ्नो मुख्य उद्देश्य रहेको उनले स्पष्ट पारेका छन्।
लामिछानेले सिंहदरबार पुग्ने होइन, सिंहदरबार बदल्ने एजेन्डासहित जनताको मत मागेको बताएका छन्। “एकाध पुल, भवन र सडकका तस्वीर बेचेर गरिने कस्मेटिक सुधारमा मेरो रुचि छैन,” उनले भनेका छन्। कुशासनको केन्द्र बनेको सिंहदरबारबाट नै ‘निलो क्रान्ति’ सुरु गर्न स्पष्ट जनम्यान्डेट आवश्यक रहेको उनको भनाइ छ।
उनले वर्षौंअघिदेखि रोपिएको अस्थिरताको जरै नउखेलिएसम्म देशमा वास्तविक परिवर्तन सम्भव नभएको उल्लेख गर्दै, आफू थप त्याग र कठोर संघर्षका लागि तयार रहेको बताएका छन्। व्यक्तिगत भविष्यभन्दा देशको भविष्य प्राथमिकतामा रहेको उनको भनाइ छ।
भ्रष्टाचारविरुद्ध कडा अभिव्यक्ति दिँदै लामिछानेले रास्वपाको नीति, सिद्धान्त र दस्तावेज स्पष्ट रूपमा उपलब्ध रहेको र आलोचकहरूले त्यसको अध्ययन गर्नुपर्ने बताएका छन्। “भारी शब्द प्रयोग गरेर राजनीति जटिल बनाउनु आवश्यक छैन,” उनले उल्लेख गरेका छन्।
उनले लोकतान्त्रिक उपलब्धि जोगाउँदै सुशासन, विकास, कूटनीति र अर्थराजनीतिको नयाँ युग सुरु गर्ने प्रतिबद्धता व्यक्त गरेका छन्। साथै, जनमतबाट अस्वीकृत भइसकेको पुरानो संसदलाई कुनै पनि षड्यन्त्रमार्फत फर्काउने प्रयास स्वीकार्य नहुने चेतावनी दिएका छन्।
फागुन २१ लाई नेपाली इतिहासको महत्वपूर्ण माइलस्टोनको रूपमा व्याख्या गर्दै उनले उक्त मितिपछि आउने संसद नयाँ हुनुपर्ने धारणा राखेका छन्। “यति वर्षसम्म देश लुटेर बनेका आपराधिक गिरोहबाट अब देश मुक्त हुनेछ,” उनले भनेका छन्।
लामिछानेले देशको भविष्य लेख्ने जिम्मा प्रत्यक्ष रूपमा जनताको हातमा रहेको उल्लेख गर्दै परिवर्तनका लागि अन्तिम निर्णय मतपत्रमार्फत गर्ने आह्वान गरेका छन्।
