काठमाडौं । मंगलबार नेपाल स्टक एक्सचेञ्ज (नेप्से) परिसूचक १२.५८ अंकले घटेर २६८३.१५ विन्दुमा बन्द भएको छ। अघिल्लो कारोबार दिन सोमबार सामान्य अंकले बढेको बजार यस दिन भने ओरालो लागेको हो।
यस दिन सेन्सेटिभ इण्डेक्स २.४५ अंकले घटेको छ भने फ्लोट इण्डेक्स ०.९८ अंक र सेन्सेटिभ फ्लोट इण्डेक्स ०.९० अंकले घटेका छन्।
नेप्से घटे पनि कारोबार रकम भने सामान्य बढेको देखिएको छ। सोमबार ८ अर्ब २२ करोड रुपैयाँको कारोबार भएको बजारमा मंगलबार ३२२ स्टकको ९२ हजार ३३८ पटकको कारोबारमा ८ अर्ब ६३ करोड १५ लाख रुपैयाँ बराबरको १ करोड ८७ लाख कित्ता शेयर खरिदबिक्री भएको छ।
यस दिन कालिञ्चोक दर्शन लिमिटेडको शेयर सकारात्मक सर्किट लेभलमा कारोबार भएको छ। कम्पनीको शेयरमूल्य ८१ रुपैयाँले बढेर ८९१ रुपैयाँमा अन्तिम कारोबार भएको हो। त्यस्तै, एचएलआई लार्ज क्याप फण्डको इकाईमूल्य करिब १० प्रतिशतले बढेको छ भने मेगाल म्युचुअल फण्ड–१ र पञ्चकन्या माई हाइड्रोपावरको शेयरमूल्य पनि उल्लेख्य रूपमा बढेका छन्।
घट्ने पक्षमा सान्भि इनर्जी र पियोर इनर्जी परेका छन्, जसको शेयरमूल्य साढे ४ प्रतिशतभन्दा बढीले घटेको छ।
कारोबार रकमका आधारमा एसवाई प्यानल नेपाल शीर्ष स्थानमा रहँदै ५९ करोड २९ लाख रुपैयाँको कारोबार भएको छ। त्यसपछि आँखु खोला जलविद्युत कम्पनीको ४१ करोड रुपैयाँभन्दा बढी र यूनियन हाइड्रोपावरको ३२ करोड रुपैयाँभन्दा बढीको कारोबार भएको छ।
१३ उपसमूहमध्ये ३ उपसमूहको परिसूचक बढेको छ भने १० उपसमूह घटेका छन्। होटल तथा पर्यटन उपसमूह सर्वाधिक १.७९ प्रतिशतले बढेको छ। म्युचुअल फण्ड र उत्पादन तथा प्रशोधन उपसमूह पनि हरियालीमा रहे। वित्त उपसमूह भने सर्वाधिक १.०९ प्रतिशतले घटेको छ।
