दमक – नेकपा एमालेले झापा क्षेत्र नम्बर प्रतिनिधिसभा निर्वाचन परिचालन कमिटीअन्तर्गत दमक नगरपालिकाका १० वटै वडामा वडास्तरीय सम्पर्क कार्यालय सञ्चालनमा ल्याएको छ।
कार्यालय सञ्चालनमा आएसँगै पार्टीका कार्यकर्ता मतदाताका घर–घर पुगेर एमालेलाई मतदान गर्न आग्रह गर्ने भएका छन्। यसअघि नै एमालेले विभिन्न भेला आयोजना गरी पार्टी अध्यक्ष तथा झापा–५ का उम्मेदवार केपी शर्मा ओलीको पक्षमा प्रचार–प्रसार सुरु गरिसकेको निर्वाचन परिचालन कमिटी संयोजक देवेन्द्र दाहालले जानकारी दिए।
दमक नगरपालिकाभित्रका सबै वडामा निर्वाचनसम्बन्धी सम्पूर्ण गतिविधि ती कार्यालयमार्फत अघि बढाइने उनले बताए। आइतबारदेखि औपचारिक रूपमा सबै वडाका कार्यालय सञ्चालनमा ल्याइएको दाहालको भनाइ छ।
प्रत्येक वडामा वडा कमिटी संयोजकसहित सो वडाभित्र बसोबास गर्ने पार्टी केन्द्रीय कमिटी, प्रदेश कमिटी, जिल्ला तथा नगर कमिटीका पदाधिकारी तथा सदस्यलाई जिम्मेवारी तोकिएको छ। साथै, जनसंगठनका पदाधिकारी, सदस्य, अगुवा कार्यकर्ता तथा विज्ञसमेत सहभागी भई दैनिक योजना तर्जुमा गरिने छ।
वडास्तरीय कार्यालयमार्फत घरदैलो कार्यक्रमलगायतका पार्टी गतिविधि सञ्चालन गरिने र टोल कमिटीलाई समेत सहजीकरण गरिने जनाइएको छ। यसअघि प्रत्येक वडामा कम्तीमा १५१ सदस्यीय र बढीमा ५०१ सदस्यीय निर्वाचन परिचालन समिति गठन भइसकेको छ।
वडा सम्पर्क कार्यालय स्थापना भएसँगै त्यहाँ तयार गरिने योजनाका आधारमा सम्बन्धित क्षेत्रका सम्पूर्ण पार्टी गतिविधिको व्यवस्थापन गरिने संयोजक दाहालले बताए।
