काठमाडौँ । सरकारले इरानमा विकसित हुँदै गएको पछिल्लो अवस्थालाई ध्यानमा राख्दै त्यहाँ रहेका नेपाली नागरिकहरूलाई जतिसक्दो चाँडो स्वदेश फर्किन अपिल गरेको छ । परराष्ट्र मन्त्रालयले ट्राभल एड्भाइजरी जारी गर्दै अवस्था सामान्य नहुञ्जेल इरान यात्रा नगर्न आग्रह गरेको हो ।
मन्त्रालयले जारी गरेको ट्राभल एड्भाइजरीमा इरान जान तयारी गरिरहेका नेपाली नागरिकहरूलाई आफ्नो यात्रा योजना स्थगित गर्न कडा अनुरोध गरिएको छ । साथै, हाल इरानमा बसोबास गरिरहेका वा काम गरिरहेका नेपाली नागरिकहरूलाई उपलब्ध जुनसुकै माध्यम प्रयोग गरी सकेसम्म चाँडो देश छोड्न सल्लाह दिइएको छ ।
आपत्कालीन अवस्थामा सहज रूपमा देश छोड्न सकियोस् भन्नका लागि पासपोर्ट, परिचयपत्रसहितका सबै यात्रा सम्बन्धी कागजातहरू तयारी अवस्थामा राख्न पनि मन्त्रालयले सुझाब दिएको छ ।
त्यसैगरी, आवश्यक समन्वय तथा सहयोगका लागि नेपालस्थित परराष्ट्र मन्त्रालय र कतारस्थित नेपाली दूतावाससँग निरन्तर सम्पर्कमा रहन पनि मन्त्रालयले आग्रह गरेको छ ।
