बिराटनगर । आगामी फागुन २१ गतेका लागि तय भएको प्रतिनिधिसभा निर्वाचन अन्तर्गत १५ जिल्लाका १८ निर्वाचन क्षेत्रको प्रत्यक्षतर्फको मतपत्र छपाइ सम्पन्न भएको छ। निर्वाचन आयोगका अनुसार मतपत्र छपाइको काम जनक शिक्षा सामग्री केन्द्र, भक्तपुरमा जारी छ।
डोल्पा, मुगु, जुम्ला, कालिकोट, हुम्ला, सल्यान र जाजरकोटको प्रत्यक्षतर्फको मतपत्र छपाइ सकिएको छ। यस्तै दैलेख क्षेत्र नं १ र २, सुर्खेत क्षेत्र नं १ र २, रुकुमपश्चिम, बाजुरा र अछाम क्षेत्र नं १ र २, कैलाली क्षेत्र नं १, झापा क्षेत्र नं ५ तथा सुनसरी क्षेत्र नं १ को मतपत्र छपाइ पनि पूरा भएको आयोगले जनाएको छ।
यसैबीच, नमूना मतपत्रतर्फ १० लाख ९८ हजार २०० प्रति छपाइ भई सम्बन्धित निर्वाचन क्षेत्रमा पुगिसकेको छ भने समानुपातिकतर्फ दुई करोड आठ लाख ३० हजार मतपत्र छपाइ सम्पन्न भइसकेको आयोगले जानकारी दिएको छ।
