काठमाडौं । नेकपा एमालेका अध्यक्ष केपी शर्मा ओलीले आगामी प्रतिनिधिसभा निर्वाचनमा देश बनाउने र देश जलाउने शक्तिबीच प्रतिस्पर्धा हुने बताएका छन्। आफू ‘देश बनाउने’ कित्तामा रहेको उल्लेख गर्दै उनले आगामी निर्वाचनमा देश हार्न नहुने जिकिर गरे।
शनिबार काठमाडौंको चाबहिलमा ओखलढुंगा–काठमाडौं सम्पर्क मञ्चद्वारा आयोजित प्रतिनिधिसभा निर्वाचन केन्द्रित कार्यकर्ता भेलालाई सम्बोधन गर्दै ओलीले भने,
‘तपाईंहरूले देशलाई विजयी बनाउनु हुनेछ। १६५ मध्ये एउटा ठाउँमा पनि देश हार्न हुँदैन।’
झापा क्षेत्र नम्बर ५ मा आफ्नो प्रतिस्पर्धी बालेन साहतर्फ संकेत गर्दै ओलीले ‘ठुटे सिङ लिएर सिङ्गौरी खेल्न आएको’ टिप्पणी गरे। बालेनको नाम नलिँदै उनले भने,
‘अण्डा दुई प्रकारका हुन्छन्— एउटा बतासे, एउटा साँच्चैको अण्डा। बतासे अण्डाबाट चल्ला निस्किँदैन।’
ओलीले आफ्ना प्रतिस्पर्धीहरूलाई लक्षित गर्दै थपे,
‘यी बतासका खेती गरिरहेका छन्। यिनीहरूसँग संगठन छैन, उद्देश्य छैन, विचार छैन। भोलि उठेर कहाँ जाने हो, आफैंलाई थाहा छैन।’
उनले अझ कडा शब्दमा आरोप लगाउँदै भने,
‘पुल्ठो झोस्न जान्ने, आगो बाल्न जान्ने, तोडफोड, आगजनी र लुटपाट गर्न जान्ने कामलाई क्रान्ति भनेर महिमामण्डन गरिएको छ।’
यस्ता गतिविधिप्रति प्रवाह नगर्न कार्यकर्तालाई आग्रह गर्दै ओलीले ती शक्तिको जनाधार नभएको दाबी गरे।
‘यी आकाशे खेती हुन्। धर्तीमा जनतासँग पुगेका छैनन्। मोबाइल भन्ने भाँडोबाट हल्ला मच्चाइएको छ,’ उनले भने।
ओलीले आफूहरू पनि प्रविधि प्रयोग गर्ने तर जनताका बीचमै रहेर देशका लागि काम गर्ने स्पष्ट पारे।
‘हामी देशलाई समृद्ध र सुरक्षित बनाउँछौं, जनतालाई सुखी बनाउँछौं। त्यो गन्तव्यबाट हामी बिचलित हुँदैनौं,’ उनले भने।
