विराटनगर– मोरङको रंगेली नगरपालिका–२ बेतौनामा नक्कली नेपाली रुपैयाँ चलाएको आरोपमा दुई जना पक्राउ परेका छन्। पक्राउ पर्नेमा ४५ वर्षीय सहमद हुसेन र ४३ वर्षीय महेन्द्र मेहता रहेका छन्।
प्रहरीका अनुसार हुसेनले माघ १३ गते साँझ बेतौनास्थित एक डिस्टिलरी पसलमा रेडबुल खरिद गर्दा एक हजार रुपैयाँको नक्कली नोट प्रयोग गरेका थिए। त्यसपछि उनले उज्जल ढकालको किराना पसलमा उधारो तिर्न अर्को हजारको नक्कली नोट दिएका थिए। नोट कागजजस्तो देखिएपछि पसलेहरूलाई शंका लागेर प्रहरीलाई खबर गरिएको थियो।
मोरङ प्रहरी नायव उपरीक्षक हरिनन्दन चौधरीका अनुसार प्रारम्भिक अनुसन्धानका क्रममा हुसेनले प्रयोग गर्दै आएको प्रदेश १–०१–००४ ह ०६३७ नम्बरको सिटी सफारीको सिटमुनि थप पाँच थान नक्कली नोट फेला परेको थियो। त्यसपछि हुसेनको बयानका आधारमा रंगेली–२ कमलझोडास्थित महेन्द्र मेहताको घरमा खानतलासी गर्दा थप नक्कली नोट बरामद गरिएको प्रहरीले जनाएको छ।
दुवै जनाको साथबाट जम्मा ९ हजार रुपैयाँ बराबरका नक्कली नेपाली नोट बरामद गरिएको छ। घटनाबारे इलाका प्रहरी कार्यालय रंगेलीले थप अनुसन्धान गरिरहेको डीएसपी चौधरीले जानकारी दिए।
सीमावर्ती जिल्ला मोरङमा पछिल्लो समय नक्कली नोटका घटना बढ्दै गएका छन्। यसअघि काठमाडौँमा जुत्ता खरिदको क्रममा फेक करेन्सीको सञ्जालसम्म प्रहरी पुगेको थियो, जसमा नेपाल–भारत सीमापारबाट नक्कली नोट छापेर पठाउने समूहका मुख्य योजनाकार पक्राउ परेका थिए।
