विराटनगर । नेपाली कांग्रेसका मोरङ निर्वाचन क्षेत्र नं. ३ का उम्मेदवार सुनिल शर्माविरुद्ध निर्वाचन आयोगमा उजुरी दर्ता भएको छ। चुनावी प्रचारका क्रममा मतदाता प्रभावित पार्ने उद्देश्यले रकम बाँडिएको आरोपसहित उजुरी परेको हो।
राष्ट्रिय ऊर्जाशील पार्टीका सोही क्षेत्रका उम्मेदवार भुवनकुमार वाग्लेले शर्माविरुद्ध निर्वाचन आयोगमा उजुरी दिएका हुन्। उजुरीमा प्रचारकै क्रममा शर्माले यम बुद्ध फाउण्डेसनलाई १० लाख रुपैयाँ उपलब्ध गराएको दाबी गरिएको छ।
उजुरीकर्ताका अनुसार उम्मेदवार शर्माले निर्वाचन आचारसंहिता विपरीत रकम वितरण गरी मतदातालाई प्रभावित पार्ने प्रयास गरेका छन्। यसलाई निर्वाचन प्रक्रियामा प्रत्यक्ष असर पार्ने गम्भीर गतिविधि भएको उल्लेख गर्दै उजुरीमा शर्मामाथि आवश्यक छानबिन तथा कारबाहीको माग गरिएको छ।
त्यस्तै उजुरीमा निर्वाचन क्षेत्रका नागरिकलाई ५० प्रतिशत निःशुल्क उपचार सुविधा उपलब्ध गराउने नाममा मतदाता आकर्षित गर्ने प्रयास गरिएको आरोप पनि लगाइएको छ।
