काठमाडौं । जनता समाजवादी पार्टी (जसपा) नेपालले आगामी प्रतिनिधिसभा निर्वाचनमा पार्टीका आधिकारिक उम्मेदवारविरुद्ध बागी उम्मेदवारी दिने नेताहरूमाथि कारबाही गरेको छ।
पार्टीले बुधबार जारी गरेको विज्ञप्तिमार्फत ८ जना नेतालाई पार्टीको साधारण सदस्यसमेत नरहने गरी निष्कासन गरेको जनाएको हो।
आगामी प्रतिनिधिसभा निर्वाचन–२०८२ मा पार्टीको नीति, निर्णय र विधानविपरीत आधिकारिक उम्मेदवारविरुद्ध बागी उम्मेदवारी दिएको तथा पार्टी अनुशासन उल्लंघन गरेको भन्दै उनीहरूलाई कारबाही गरिएको विज्ञप्तिमा उल्लेख छ।
पार्टीका संरक्षक महन्थ ठाकुर र अध्यक्ष उपेन्द्र यादवद्वारा संयुक्त रूपमा जारी विज्ञप्तिमा पार्टी हितविपरीत गतिविधिमा संलग्न भएकाले आजकै मितिदेखि लागू हुने गरी निष्कासन गरिएको जनाइएको छ।
निष्कासनमा पर्नेहरूमा पर्साका नेता प्रदीप यादवसहित ८ जना रहेका छन्। अन्य निष्कासित नेताहरूमा बाराका कमरुल्लाह अन्सारी, नवलकिशोर सिंह, चन्दनकुमार सिंह र आत्माराम साह रहेका छन्।
त्यसैगरी सर्लाहीका उदयकान्त मिश्र तथा महोत्तरीका हरिनारायण यादव र डा. शिवजी यादवलाई पनि पार्टीबाट निष्कासन गरिएको विज्ञप्तिमा उल्लेख छ।
निर्वाचनमा पार्टीका आधिकारिक उम्मेदवारलाई सघाउनुको साटो बागी उम्मेदवारी दिएपछि उनीहरूलाई कारबाहीको दायरामा ल्याइएको जसपा नेपालले जनाएको छ।
