काठमाडौं । रोजगार अनुमति प्रणाली (ईपीएस) अन्तर्गत भाषा तथा सीप परीक्षा उत्तीर्ण गरे पनि लामो समयसम्म दक्षिण कोरिया जान नपाएको भन्दै युवाहरूले काठमाडौंमा प्रदर्शन गरेका छन् ।
कृषि तथा पानीजहाज (फिसिङ) क्षेत्रका लागि भाषा परीक्षा उत्तीर्ण गरी रोस्टरमा नाम समावेश भएको एक वर्षभन्दा बढी समय बितिसक्दा पनि रोजगारीका लागि छनोट नपरेको भन्दै उनीहरूले मंगलबार (माघ १३) काठमाडौंको माइतीघर मण्डलामा प्रदर्शन गरेका हुन् ।
ईपीएस प्रणालीअनुसार भाषा तथा सीप परीक्षा उत्तीर्ण गरेर रोस्टरमा रहेका व्यक्तिहरू दुई वर्षसम्म रोजगारदाताबाट छनोट नभए नाम स्वतः हट्ने प्रावधान छ । यही प्रावधानप्रति आपत्ति जनाउँदै प्रदर्शनमा उत्रिएका युवाहरूले रोस्टर अवधि दुई वर्षबाट थप गर्न माग गरेका छन् ।
प्रदर्शनका क्रममा सहभागीहरूले ‘ईपीएसको लुट धन्दा बन्द गर’, ‘कृषि तथा पानीजहाजको रोस्टर अवधि थप गर’ लगायतका नारा लेखिएका प्लेकार्ड प्रदर्शन गरेका थिए ।
