काठमाडौं। नेकपा (एमाले) का अध्यक्ष केपी शर्मा ओलीले सामाजिक सञ्जालमा गरेको स्टाटसप्रति राष्ट्रिय स्वतन्त्र पार्टीका वरिष्ठ नेता तथा काठमाडौं महानगरपालिकाका निवर्तमान मेयर बालेन्द्र शाह (बालेन) ले कमेन्टमार्फत तीव्र प्रतिक्रिया जनाएका छन्।
ओलीले आगामी निर्वाचनमा देश बनाउने र देश जलाउने पक्षबीच प्रतिस्पर्धा हुने टिप्पणीसहित डिबेटका लागि तयार रहेको उल्लेख गरेपछि बालेनले सोही स्टाटसको कमेन्ट सेक्सनमा आफ्नो धारणा राखेका हुन्।
बालेनले कमेन्टमा लेखेका छन्, “आफूलाई देश जलाउनेको रूपमा स्वीकारेको ठिकै छ, हुन पनि नेताहरूको घर कता–कता छन् तपाईंहरूलाई नै थाहा थियो। तपाईंहरूले आफैं २३ गते बच्चाहरू मारेको आतङ्कवाद लुकाउन २४ गते जलाएको हो।”
उनले त्यसै कमेन्टमा थप लेख्दै प्रश्न गरेका छन्, “आफूलाई आतङ्कवादी चाहिँ कहिले स्वीकार्ने हो ?त्योपछि अरू कुरा गरौँला !”
बालेनले ७६ जना बालबालिकाको हत्या भएको घटनातर्फ संकेत गर्दै त्यससँग जोडिएका व्यक्ति तथा उनका मतियारसँग एउटै मञ्चमा उभिनु भनेको आफू पनि त्यसमा सामेल भएको अर्थ लाग्ने उल्लेख गरेका छन्।
बालेनको उक्त कमेन्ट सार्वजनिक भएसँगै सामाजिक सञ्जालमा तीव्र प्रतिक्रिया आएको छ भने राजनीतिक वृत्तमा पनि यसबारे चर्चा सुरु भएको छ। निर्वाचनको माहोलसँगै नेताहरूबीच सामाजिक सञ्जालमै आरोप–प्रत्यारोप बढ्दै गएको देखिन्छ।
