काठमाडौं, १० माघ । निर्वाचन आयोगले समानुपातिक निर्वाचन प्रणालीतर्फका १ करोड ५० लाख मतपत्र छपाइ सम्पन्न भएको जनाएको छ।
माघ २ गतेदेखि जनक शिक्षा सामग्री केन्द्रमा सुरु भएको मतपत्र छपाइमा अब ५० लाख मतपत्र छाप्न बाँकी रहेको आयोगले जानकारी दिएको छ।
समानुपातिकतर्फको छपाइ सकिएसँगै प्रत्यक्ष निर्वाचन प्रणालीतर्फको मतपत्र छपाइ सुरु हुने आयोगले जनाएको छ।
प्रत्यक्षतर्फका उम्मेदवारको अन्तिम नामावली तय भइसकेको छ। मनोनयन प्रयोजनका लागि मतदाता नामावली सबै जिल्लामा वितरण गरिसकिएको आयोगले जनाएको छ।
आगामी फागुन २१ गते हुने प्रतिनिधिसभा निर्वाचनका लागि ३ हजार ४०६ उम्मेदवार रहेको आयोगले सार्वजनिक गरेको छ। शुक्रबार नै निर्वाचन चिह्नसमेत प्रदान गरिएको छ।
आयोगका प्रवक्ता नारायणप्रसाद भट्टराईका अनुसार उम्मेदवारमध्ये पुरुष : ३,०१७, महिला : ३८८ र अन्य : १ जना रहेका छन्।उम्मेदवारी दर्तादेखि फिर्तासम्मको प्रक्रिया शान्तिपूर्ण र उत्साहजनक रूपमा सम्पन्न भएको आयोगले जनाएको छ।
