विराटनगर । नेकपा एमालेका नेता महेश बस्नेतले चुनावको मुखमा काठमाडौं महानगरपालिकाका निवर्तमान मेयर, राष्ट्रिय स्वतन्त्र पार्टीका वरिष्ठ नेता तथा झापा -५ का प्रतिनिधि सभा उम्मेदवार बालेन्द शाह(बालेन ) को पाथिभरा मन्दिर दर्शन गरेको विषयमा लिएर टिप्पणी गरेका छन्।
बस्नेतले हिन्दु संस्कारअनुसार आफन्तको निधनपछि केही समय पूजा–दर्शन गर्न नमिल्ने उल्लेख गर्दै पाथिभरा दर्शनको समयलाई लिएर प्रश्न उठाएका हुन्। उनले यसलाई चुनावी सन्दर्भसँग जोड्दै टिप्पणी गरेका थिए।
मधेसी समुदायको संस्कार फरक रहेको उल्लेख गर्दै सोह्र सराँद्ध सम्पन्न भएपछि पूजा–पाठ तथा धार्मिक कर्म गर्न मिल्ने परम्परा रहेको भन्दै बस्नेतको टिप्पणीप्रति प्रतिवाद आएको छ। कसैमाथि सार्वजनिक टिप्पणी गर्नुअघि सम्बन्धित समुदायको संस्कार, संस्कृति र परम्पराबारे बुझ्नुपर्ने प्रतिक्रिया पनि व्यापक रूपमा व्यक्त गरिएको छ।
तर बस्नेत केही दिनअघि जनकपुरमा बालेन शाहले गरेको सम्बोधनलाई लिएर दिएको प्रतिक्रियापछि भने विवादमा परेका छन्। उनको अभिव्यक्तिले मधेसी समुदायलाई होच्याएको आरोप लागेपछि सामाजिक सञ्जालमा चौतर्फी आलोचना भइरहेको छ ।
बस्नेतको मधेसी समुदायको टिप्पणी पछि सामाजिक सञ्जालमा उनलाई मधेश प्रदेशमा प्रवेशमा रोक लगाउनुपर्ने भन्ने सम्मका बहस चलेका छन्। यसले धर्म, संस्कृति र राजनीति जोडिँदा उत्पन्न हुने संवेदनशीलतालाई पुनः सतहमा ल्याएको छ।
महेश बस्नेतले बालेन शाहलगायत वैकल्पिक राजनीतिक शक्तिहरूमाथि यसअघि पनि निरन्तर आलोचनात्मक टिप्पणी गर्दै आइरहेका छन् ।
