विराटनगर – विराटनगरस्थित आदर्श माध्यमिक विद्यालयले चालु शैक्षिक सत्रमा भर्ना भएका सूचना प्रविधि (आइटी) तर्फका २० जना औद्योगिक प्रशिक्षार्थीलाई औद्योगिक क्षेत्र भ्रमण गराएको छ ।
२४ महिने अप्रेन्टिसशिप कार्यक्रमअन्तर्गत भर्ना भएका प्रशिक्षार्थीहरूलाई बिहीबार औद्योगिक भ्रमणमा लगिएको हो ।
भ्रमणका क्रममा प्रशिक्षार्थीहरूलाई शिवम प्लास्टिक इन्डस्ट्रिज लिमिटेड, वर्ल्डलिङ्क र टेकफिनिटी सोलुसन्स जस्ता उद्योग प्रतिष्ठानमा लगिएको थियो ।
विद्यालयले प्रशिक्षार्थीहरूलाई कामको संसार चिनाउन र उद्योग-प्रतिष्ठानमा गर्नुपर्ने काम प्रत्यक्ष रूपमा देखाउन, आत्मविश्वास जगाउने उद्देश्यका साथ औद्योगिक भ्रमणमा लगेको हो ।
कार्यक्रम संयोजक इन्द्रबहादुर चौहानले यस्तो भ्रमणले प्रशिक्षार्थीहरूलाई आफ्नो रोजाइको कार्यस्थल छान्न सहज हुने जानकारी दिए ।
उद्योग र शिक्षालयको अध्ययनलाई जोड्ने यस्तो शिक्षाले प्रशिक्षार्थीहरूमा आत्मविश्वास जगाउन सहयोग पुर्याउने उनको विश्वास छ ।
विद्यालयका प्रशिक्षक तथा क्यान महासंघ मोरङका सचिव अजित चापागाईंका अनुसार बजार र उद्योगमा अप्रेन्टिसहरूको माग अत्यधिक रहेको छ ।
सूचना प्रविधिको कार्यक्षेत्र व्यापक भएकाले प्रशिक्षार्थीहरूको पहिलो रोजाइ समेत सूचना प्रविधि नै रहेको उनले बताए ।
इन्स्योर परियोजनाका टिभेट अफिसर घनश्याम लिम्बुका अनुसार अप्रेन्टिसहरूसँग ज्ञान, सीप र व्यावसायिक क्षमता हुने भएकाले बजारमा उनीहरूको माग बढेको छ ।
भ्रमणका क्रममा प्रशिक्षार्थीहरूले आवश्यक सीप, पारिश्रमिक र स्थायित्व लगायत विभिन्न प्रश्न सोधेका थिए ।
उद्योगका आइटी विज्ञ, मानव संसाधन प्रबन्धक, महाप्रबन्धक र सुपरभाइजरहरूले सरल र सहज रूपमा उत्तर दिएका थिए ।
नेपाल सरकार र स्विस सरकारको संयुक्त कार्यक्रम सामाजिक विकास मन्त्रालय र इन्स्योर परियोजनाअन्तर्गत सञ्चालनमा छ ।
यस वर्ष विद्यालयमा २० जनाको कोटामा ८८ जनाले भर्ना आवेदन दिएका थिए ।
