झापा । बुद्धशान्ति गाउँपालिका–३ की तारादेवी अधिकारीले शीतला झोला उद्योग स्थापना गरी साधारण गृहिणीबाट सफल उद्यमी बन्न सफल भएकी छन्।
१२ वर्षअघि सिलाइकटाइ तालिमबाट सुरु भएको उनको यात्रा आज १८ महिलालाई पूर्णकालीन र १५ महिलालाई आंशिक रोजगारी दिने उद्योगमा परिणत भएको छ। ढाका, अल्लो जस्ता कच्चा पदार्थ प्रयोग गरी उत्पादन हुने झोला ५० रुपैयाँदेखि ३,५०० रुपैयाँसम्ममा बिक्री हुन्छ।
खर्च कटाएर वार्षिक करिब १५ लाख रुपैयाँ नाफा हुने उनको भनाइ छ। त्यही आम्दानीबाट उनले प्रगतिटोलमै तीनतले घर बनाइन् र भुइँतलामा उद्योग सञ्चालन गर्दै आएकी छन्। फेसबुक, टिकटकजस्ता सामाजिक सञ्जाल र स्थानीय मेला–हाटमार्फत उनी उत्पादनको प्रचार–प्रसार गर्छिन्।
उनको आगामी योजना अझ ठूलो छ — नयाँ प्रविधि र आकर्षक डिजाइनमा लगानी गर्ने, साथै देशभर तालिम सञ्चालन गरेर अझ बढी महिलालाई रोजगारी सिर्जना गर्ने। तारादेवीले स्थानीय तह र सामुदायिक संस्थासँग सहकार्य गरेर झोला सिलाइ तालिम पनि दिँदै आएकी छिन्। तालिम पाएपछि महिलाहरूले आफ्नै क्षेत्रमा सानो स्तरमै झोला उत्पादन सुरु गर्ने अवसर पाएका छन्।
उनको उद्योगका उत्पादन झापा, इलाम, पाँचथर, ताप्लेजुङ हुँदै कञ्चनपुरसम्म पुग्छन्। वार्षिक करिब १५ लाख नाफा कमाउने यो उद्योगले महिलालाई सीप, रोजगारी र आत्मनिर्भरता दिलाएको छ।
