हुम्ला । हुम्लाको ताँजाकोट गाउँपालिकामा काम गर्दै आएकी महिला स्वास्थ्यकर्मीमाथि बलात्कार प्रयास गर्ने तीन जना कर्मचारी पक्राउ परेका छन् । उनीहरुले मंगलबार राती करिब ११ बजेको समयमा महिला स्वास्थ्यकर्मीको कोठामा गई बन्दक राखेको भन्ने सुचनाको आधारमा जिल्ला प्रहरी कार्यालयको निर्देशनमा छप्रेला प्रहरी चौकीको टोलीले राती नै पक्राउ गरेको हो ।
एक गैरसरकारी संस्थामार्फत ताँजाकोट गाँउपालिकामा स्वास्थ्य सम्बन्धि काम गर्दै आएकी स्वास्थ्यकर्मीमाथि बलात्कार प्रयास गर्ने ताँजाकोट गाँउपालिका वडा नंं ३ मैला स्थित स्वास्थ्य चौकी इन्चार्ज लिलाराज शर्मा, गाउँपालिकाका एम्बुलेन्स चालक मंगल शाही र कार्यालय सहयोगी राम बहादुर बुढा पक्राउ परेका हुन् । श्रोतका अनुसार मैला स्वास्थ्य चौकी इन्चार्ज शर्मा सहित तीनै जनाले मदीरा सेवन गरी उनकोे कोठामा गएर सामुहिक बलात्कार प्रयास गरेका हुन् ।
मंगलबार राती करिब ११ बजेको समयमा महिला स्वास्थ्यकर्मीको कोठामा गई बन्दक राखेको भन्ने सुचनाको आधारमा जिल्ला प्रहरी कार्यालयको निर्देशनमा छप्रेला प्रहरी चौकीले राती नै पक्राउ गरेको हो । जिल्ला प्रहरी प्रमूख डिएसपी संकर पोख्रेलका अनुसार महिला स्वास्थ्यकर्मी माथि अबद्र व्यवहार गरेको भन्ने सूचनाको आधारमा मैला स्वास्थ्य चौकीका तीना जना कर्मचारी पक्राउ गरेको पुष्टि गरे । उनका अनुसार घटनाको बिषयमा थप अनुसन्धान भईरहेको छ । प्रारम्भीक रुपमा महिला स्वास्थ्यकर्मीमाथि अभद्र व्यवहार गरेको भन्ने छ । बलात्कार प्रयासका बिषयमा थप अनुसन्धानबाट सबै बिबरण आउला । उनीहरुलाई पक्राउ गरे लगत्तै दुबै पक्षलाई जिल्ला सदरमुकाम सिमकोट ल्याईएको छ ।
मदिरा सेवन गरि रातिको समयमा निज पिडतको कोठामा गई विभिन्न खाले यौन दुर्ववहारका कुराहरू गरेपछि उनी कर्मचारीले आफ्नो संस्थाको केन्द्रीय कार्यालयमा जानकारी गराईन् । उक्त संस्थाको केन्द्रीय कार्यालयले जिल्ला प्रहरी कार्यालयलाई उक्त कुरा जानकारी गराएपछि दुरव्यवहार आरोपित तीनै जनालाई प्रहरीले पक्राउ गरेको हो ।
