नेपाली कांग्रेसको भ्रातृ संगठन नेपाल तरूण दलले पाँचौँ महाधिवेशनका लागि कार्यतालिका निर्धारण गरेको छ । आगामी मंसिर २६– २८ का लागि तय भएको महाधिवेशनका लागि तरूण दलले मातहतका कार्यसमितिले सम्पादन गर्नुपर्ने कार्यतालिका निर्धारण गरेको हो ।
अध्यक्ष विद्वान गुरूङले जिल्ला कार्यसमितिहरूलाई पठाएको परिपत्रमा भदौ १५ गतेभित्र पूर्ण सदस्यता वितरण गरी वडा र पालिकाको अधिवेशन सम्पन्न गर्न भनिएको छ ।
भदौ मसान्तभित्र दलको केन्द्रीय कार्यालयबाट पूर्ण सदस्यता स्वीकृत गर्ने र क्षेत्रीय र जिल्ला अधिवेशन प्रतिनिधि अनुमोदन गरिसक्ने कार्यतालिका तय गरिएको परिपत्रमा उल्लेख छ ।
परिपत्रअनुसार आगामी कात्तिक २० गतेभित्र प्रदेशसभा निर्वाचन क्षेत्र र संघीय निर्वाचन क्षेत्रको अधिवेशन सम्पन्न गरिसक्नुपर्ने छ । जिल्ला कार्यसमितिहरूलाई कात्तिक मसान्तभित्र जिल्ला अधिवेशन सम्पन्न गर्न निर्देशन दिइएको छ ।
